ابلسكيوا ( كرات البانكيك )

***

***

أهلين..

مبارك عليكم شهر رمضان ..

والله يعيدة علينا وعليكم بصحة وعافية..

***

تأخري بالتدوين يكون لأنشغالي دائماَ ولاني مااحب اكتب المواضيع بعجل

ومكن مااوصل المعلومات صح أو مايكون الشرح واضح..

ياليت الكل يقدر هالشي ..

ومقدرة لكم حماسكم لما انزل شي ويعجبكم وتبون طريقتة 3>

***

البانكيك الدنماركي..

وأسمة  Æbleskiver /  ebelskiver

ينطق بالأنجليزي ابلسكيفر وباللغة الدنماركية ابلسكيوا..

والكلمة تعني ( شرائح التفاح )

شكلة يجي كروي ومفرغ من جوا ..

له مقلاية يسوى فيها ..

وانا سويتة بآلة الكيك بوبس والنتيجة مضبوط مررره

طريقة تقديمة يكون مع سكر باودر على الوجة ومحشي مربى

او ممكن ينحط المربى على الوجة مع السكر الباودر

بس مو معنى ذلك انه مانقدر نحشية أشياء ثانية مثل الثوت او الشوكولاتة

طيب متى نحط الحشوة؟

ممكن بعد مايخلص بكيس حلواني مع قمع صغير مناسب للحشو و نحط بالكيس مربى

ونحشي كل حبة ( انا حشيتة مربى ولبنة)

ونقدر نحشيها بعد مانصب الخليط بالآلة نحط بالوسط الحشوة

طيب المهم هل بيكون حلاها زايد مع المربى والسكر ؟

لا ماراح تكون حالية لان العجينة فيها بس ملعقة كبيرة سكر

يعني ابد مو حالية

***

المقادير..

1 1/4 طحين

3/4 ملعقة صغيرة باكينج باودر

1/4 ملعقة صغيرة ملح

1 ملعقة كبيرة سكر

2 بيضة مفصول الصفار عن البياض

1 كاس حليب كامل الدسم

2 ملعقة كبيرة زبدة مذابة

1 ملعقة صغيرة فانيلا

زيت ( لدهن الآله )

—

2 من ( أعواد الشوي الخشب / أو أعواد الأكل الصينية chopsticks )

( مربى وسكر باودر )

***

***

الطريقة ..

– نخلط الطحين والباكينج باودر والملح مع بعض

– نخلط صفار البيض والسكر والحليب والزبدة المذابة والفانيلا مع بعض

– نخلط الخليطين مع بعض حتى يمتزجون ( صفار البيض والطحين )

– وبسرعه متوسطة نخلط بياض البيض حتى يتماسك ويكون جامد

يعني راح يكون عبارة عن خليط كثيف متماسك

ولما نرفع الخلاطة بيكون عندنا زي المنقار هنا علطول نوقف خلط

والمهم مانزود بالخلط هذا اهم شي ..

ناخذ ثلث بياض البيض ونخلطة بالسبتيولا مع الخليط اللي قبل (صفار البيض والطحين)

حتى يمتزج وبعدها نضيف باقي بياض البيض

وطريقة الخلط تكون من تحت لفوق وبحركة دائرية

حتى تمتج كل المكونات مع بعض..

– ندهن الاله بزيت ونخليها حتى تسخن شوي ونصب الخليط حتى يملاء المكان

ومجرد ماتطلع فقاقيع ونلاحظ انه الاطراف بدت تنضج

نقلبها نص قلبه بإستخدام الأعواد

وننتبه مانقلبها مره وحدة والا ماراح يكون الشكل كروي ولاراح تكون مفرغه من جوا

بعدها راح نقلبها من الجهة اليمين ونقلبها القلبة الاخيرة

لاحظوا الصور كيف اقلبها تدريجياً ..

وهنا فيديو اخترته لكم يوضح كيف الطريقة

اخر شي نقلبها ونخليها حتى تنضج وتحمر مع جميع الجهات

طبعاً نفسها نفس الكيك نختبر النضج بعود الأسنان

نحشيها زي ماقلت بإستخدام كيس حلواني وقمع مناسب

وبالعافية..

***

وأتمنى أن الأسئلة عن اي شي غير مفهوم بالوصفة يكون هنا

حتى تعم الفائدة للجميع وافهم القصد من السؤال..

***

منغوليان بيف

***

 

***

 أهلين..

المنقوليان بيف

واحد من الأطباق المشهورة اللي تتقدم بالمطاعم الصينية

عبارة عن شرايح من لحم البقر عادة من جزء في البقر يسمى ( flank )

وهالصورة توضح اي جزء ..

ولو حبيتوا تعرفون اكثر عن أجزاء البقر بشكل مفصل شوفوا هالموضوع هنـا

طبعاً تقدرون تستخدمون اي جزء ثاني من لحم البقر..

الطبق يكون عادة مع الخضار والصوص البني

من مكوناته الاساسية صوص هويسون وصويا صوص والفلفل الحار والبصل الأخضر

يقدم مع النودلز أو الرز المطبوخ على البخار

***

هنا فيه أشياء أستخدمتها راح أوضحها ..

أولاً البهارات الصينية الخمس..

عبارة عن خليط من خمس بهارات تستخدم بالمطبخ الصيني وهي..

( يانسون نجمي – قرنفل – قرفة – شمر – فلفل سيشوان )

***

السكر البني الغامق..

سبق وتكلمت عنه ..

هو دبس السكر وبطبيعته يكون رطب شوي

ويسمى ماسكوفادو Muscovado

ويعرف بعد بأسم Barbados sugar سكر بربادوس

 و  molasses sugar دبس السكر  و moist sugar السكر الرطب

لونة غامق و طعمة قوي غير السكر البني الفاتح

يدخل غالباً في صناعة الخبز..

***

المقادير..

التتبيل ..

1/2 كيلو لحم بقر  ( استخدمت flank ) نقطعه شرايح رقيقة وعريضة شوي

1 ملعقة كبيرة نشأ

1 بياض بيضة

رشة ملح

1 ملعقة صغيرة زيت سمسم

للصوص..

1 ملعقة كبيرة ثوم مفروم

1/2 ملعقة صغيرة زنجبيل مبشور

3 ملاعق كبيرة صوص هويسون

2 ملعقة كبيرة ماء ( أو مرق إذا متوفر )

1 ملعقة كبيرة صويا صوص غامق ( النوع الثقيل )

2 ملعقة صغيرة خل الرز

3/4 ملعقة صغيرة البهارات الخمس الصينية

1/4 ملعقة صغيرة فلفل حار مفروم ناعم مره ( إختياري )

1  ملعقة صغيرة سكر بني غامق ( ممكن تزودنه ملعقة زيادة لو حابينه حالي اكثر)

2 ملعقة صغيرة زيت

الخضار ..

2 بصل أخضر (شوي راح أخلطة مع اللحم وشوي للتقديم)

1 بصل ابيض مقطعه صغير

1 ملعقة صغيرة كزبره ( إختياري )

***

الطريقة..

– نخلط مقادير التتبيلة ونتبل اللحم ونخلية نص ساعه

– نسوي الصوص في قدر على درجة حرارة متوسطة الى منخفضة

نحط الزيت ونضيفله الثوم والزنجبيل

نقلبهم على النار شوي ونضيف باقي مكونات الصوص ماعدا السكر

– نحرك الصوص شوي بعدها نضيف السكر ونخليه يذوب تماماً

– ونخلي الصوص يغلي على درجة حرارة متوسطة

من دقيقتين لثلاث دقايق.. المهم حتى يكون عندنا صوص غليظ

– نشيله من على النار ونخليه على جنب

– في المقلاة المخصصه ( لازم تكون عميقة ) نحط كاس زيت

حتى يكون ساخن بس المهم مانخليه حتى يدخن ننتبه لهالنقطة

– نضيف اللحم ونقلبه لمدة دقيقتين او حتى تكون اطرافه غامقه

( هنا النار لازم تكون عالية )

بعدها نشيل اللحم ونخليه على ورق تجفيف

– نتخلص من أغلب الزيت اللي في المقلاية

نخلي بس شي بسيط مقدار ملعقة صغيرة تقريباً

نضيف البصل العادي وثلاث ارباع كمية البصل الاخضر

ونقلبهم لمدة دقيقة..

– نضيف اللحم والصوص على البصل ..

– ونخليهم يطبخون لمدة دقيقة لدقيقتين..

– نحط اللحم في صحن التقديم ونزينة بالبصل الأخضر والكزبرة ..

– نقدمة مع الرز الأبيض ..

***

حلوى الجزر ( كاجر كا حلوه)

***

***

أهلين ..

نبذة عن حلوى الجزر ..

يسمى ب( حلوه الجزر) أو( كاجر كا حلوه ) أو ( كجريلا ) أو ( كاجر كا جريلا )

وهو من حلويات جنوب اسيا ( الهند – بنجاب – باكستان ….)

مكوناته بسيطة .. بس الطعم جداً لذيذ

يحتوي على الجزر الحليب السكر والسمن والمكسرات وممكن اضافة الزبيب

هالنوع من الحلويات يجي شوي دسم..

وميزة اننا نسوية بالبيت انه نقدر نقلل كمية الدهن والطعم نفسه مايتغير..

***

المقادير..

2 كأس جزر مبشور ( لازم يكون مبشور كبير )

1 كاس حليب طازج كامل الدسم

1 ملعقة صغيرة سمن

1/2 كاس سكر ( أو 3/4 كاس حسب الرغبة)

رشة هيل

مكسرات ( حسب الرغبة – استخدمت لوز وفستق وكاجو )

زبيب ( أختياري )

***

الطريقة ..

نحمص الكاجو واللوز بملعقة زيت ونخليهم على جنب..

نحط السمن في قدر على النار حتى يذوب ونضيف الجزر

ونقلب شوي حتى يبدأ الجزر يذبل ..

بعدها نضيف الحليب.. ونحركة زين ونخليه على نار هادية لمتوسطة

حتى يبقى بس ربع الحليب .. هنا نضيف السكر والهيل ونحرك زين

ونخليه على النار حتى يشرب الجزر كل الحليب ..

نضيق المكسرات ونخلطها مع الجزر .. ونخلي شوي على الوجة..

وبالعافية..

***

ملاحظة..

1- الحليب نقدر نزيدة الى كاس زيادة لو احتجنا..

2- هنا انا مازودت الحليب لانه استخدمت جبنة هندية تسمى تشنا

( وتسمى بعد بانيير هي نفسها الريكوتا مع اختلاف المسمى حسب الدولة)

هي اختيارية لو حابين تضيفونها او لا ..

لو اضفتوها لاتزودون كمية الحليب ..اكتفوا بكاس واحد حليب مع الجبنة..

بالنسبة للجبنة اللي لاحظتة عطت الجزر قوام كريمي اكثر ..

بس ماغيرت بالطعم بشكل واضح لهالشي ماكتبتها من الوصفة

وخليتها اختيارية..

طيب كيف نسوي التشنا..

على النار نحط 4 كاسات حليب على النار ونرفع عليه النار

ونحركه من فتره للثانية حتى مايحترق بأسفل القدر

اول مايغلي الحليب نضيف ملعقتين كبار ليمون

نخليه على النار من دقيقتين لثلاث ونطفي النار ونخلي حتى يبدأ يبرد شوي..

راح تنفصل المكونات عن بعض

نحط شاش ونصفي فيه الجبن ( التشنا )..

راح ناخذ ملعقة ونص كبيرة من التشنا ونضيفها قبل نسكر النار بشوي

يعني قبل لايشرب الجزر كل الحليب..

3- هالوصفة ممكن تكون للدايت بإستخدام زيت كانولا بدال السمن

وحليب قليل الدسم بدال كامل الدسم ( ماانصح بمنزوع الدسم)

وسكر مناسب للحمية أو عسل .. مع المكسرات تكون نية ..

***

تشيزكيك الشوكولاتة المملحة والكراميل مع البيكان المدخن

***

***

المقادير..

—

للكرست..

٣٠٠ جم اوريو

١٠٠ جم زبدة مذابه

—

للتيشزكيك..

٦٠٠ جم جبنة كريمية

١ حليب مكثف محلى ( نستله ) الحجم الكبير ( ٣٩٥ جم )

١/٤ كأس سكر

٥ ملاعق كبيرة عصير ليمون

٢ ملعقة صغيرة فانيلا

٣ بيض حجم كبير

١٠٠ جم شوكولاتة غامقة ( ٧٠٪)

—

للكراميل..

٢٥٠ مل كريمة

٢٠٠ جم سكر

من ٢٠ الى ٣٠ جم زبدة

1 ملعقة صغيرة فانيلا

—

للتشوكلت جاناش..

١٠٠ جم شوكولاتة

١٠٠ مل كريمة

ملح بحر ( إختياري )

—

للتزيين..

بيكان مدخن ( او عادي حسب الرغبة)

***

الطريقة..

مقاس الصينية المفروض ( من ١٨ الى ٢٤ سم )

ارتفاعها ٧ سم خصوصاً لو كان مقاسها ١٨

…

بالفود بروسيسر نخلط الاوريو مع الزبدة المذابه

نوزع الاوريو بالصينية بالجوانب والأطراف ..

وأحسن شي نستخدم السبتيولا لتوزيع الاوريو

نلبس الصينية بالقصدير تقريبا يوصل لنص الصينية

ندخله الثلاجة حتى تجهيز خليط التيشزكيك

نولع الفرن على درجة ١٦٠ ( ٣٢٠)

بطاسه نخلط الجبن مع الحليب المركز حتى يكون عندنا خليط كريمي

نضيف عليهم السكر وعصير الليمون البيض والفانيلا

نخلطهم مع بعض حتى تمتزج المكونات مع بعض..

نذوب الشوكولاتة ونخليها تبرد شوي

نخلط الشوكولاتة مع ثلث خليط التشيز

نجيب صينية التشيزكيك ونصب فيها خليط التشيز بالشوكولاتة بالأول

وبعدها نصب الباقي من الخليط

بعدها نغلي موية ونحط صينية التشيزكيك بصينية ثانية اكبر منها

وندخلها بالفرن ونصب بالصينية الثانية الموية المغلية

المفروض الموية تغطي نص صينية التشيزكيك

نخليها بالفرن ساعه وربع ( ١:١٥ دقيقة)

او حتى ندخل فيها عود الأسنان ويطلع نضيف

نسكر عليها الفرن بس مانطلعها ونخليها من ربع لنص ساعه بالفرن

( وانبه ان الفرن مطفى)  هالحركة هي اللي راح تخلي التشيزكيك مايهبط

بعدها نطلعه من الفرن ونخليه يبرد تماماً

بعدها ندخله الثلاجة ونخلية من ٦-٨ ساعات

او نسوية قبل بيوم…

***

للكراميل..

نحط السكر على النار بدون تحريك..

طبعاً اللي بنلاحظة ان السكر بيذوب بالأطراف بالبداية

اذا بدأ يذوب ويكون لونة بني نخلية شوي وبعدها نحركة

نشيله من النار ونبقى نحركة حتى يذوب تماماً

نسخن الكريم في قدر ثاني .. حتى يسخن بس مانخلية يغلي

نحط الزبدة على الكراميل ونحرك بسرعه حتى تمتزج كلها مع السكر المحروق

راح السكر يتحول لمعجون ثقيل في هالمرحلة

نرجع السكر مره ثانية على النار ونضيف الكريم عليه تدريجياً

ننتبة في هالمرحلة من السكر والكريم لانه ممكن يرش علينا وهو بيكون حار مره

نخلي الكراميل يغلي دقايق معدودة نضيف الفانيلا ونحرك

نشيل الكراميل من على النار

نخلي الكراميل يبرد ونضيفة على خليط التشيزكيك..

او ممكن نسوية من قبل ونحتفظ فيه بالثلاجة

بس قبل استخدامة نطلعه من الثلاجة ونخلية يكون بدرجة حرارة الغرفة..

انا افضل اسوية بنفس الوقت واخلية يبرد ( بدون ماادخلة الثلاجة)

واضيفة مباشرة على التشيزكيك

لانه احيان يكون يثقل مره لما ندخلة الثلاجة..

***

للتشوكلت جاناش..

نكسر الشكولاتة كسر صغيرة

نسخن الكريم مجرد مايسخن بدون مايغلي

نشيلة من على النار ونضيف الشكولاتة حتى تذوب

ونخلية يبرد شوي

بعدها نضيفة على التشيزكيك فوق الكراميل

( لاحظوا الصورة كيف طالعه التغطية طبقتين من الكراميل والشوكولاتة)

نزين بالبيكان.. ونرش رشة بسيطة من ملح البحر..

وبالعافية..

***

خبز البريتزل مع حشوة الأجبان والبيبروني والبصل المكرمل

***

***

المقادير..

((( للخبز )))

…

المقادير (1) //

2 1/4 كاس طحين

2 ملعقة صغيرة خميرة

1 1/2 ملعقة صغيرة سكر

1 ملعقة صغيرة ملح

3/4 كاس ماء دافيء بدرجة ( 110 F)  تقريباً

2 ملعقة كبيرة زبدة ذائبة

***

المقادير(2)//

2 ملعقة كبيرة بكينج صودا

ماء مغلي

بيضة

ملح بحر

***

الطريقة..

نحط الماء مع الخميرة والسكر ونخليهم من عشر دقايق لربع ساعه..

في هالاثناء نذوب الزبدة ونخليها حتى تبرد شوي..

نخلط الطحين والملح..

بعد ماخلينا الخميرة ربع ساعه (15 دقيقة) راح نلاحظ ان لها رغوة ..

نضيف الزبدة للخميرة

ونضيفهم للطحين ونعجن لمدة مابين 5-10 دقايق

حتى تكون عندنا جينة لينة بس ماتلزق باليد..

نحط العجينة بوعاء مدهون بزيت زيتون ونخليها تخمر من ساعه لساعه ونص..

المهم حتى يكون حجم العجينة الدبل

بعدها نشكلها لدوائر متساوية بالحجم

انا استخدمت الميزان حتى اضمن ان كلهم يطلعون نفس الحجم

نغطيها بمنشفة ونخليها تخمر مره ثانية لمدة نص ساعه ( 30 دقيقة )..

لما يكون للعجينة ربع ساعه نشعل الفرن على درجة (200 / 400)..

ونجهز المقادير الثانية اللي هي بكينج صودا والماء

والطريقة نجيب قدر ونحط فيه ماء مغلي وتدريجياً نضيف البيكنج صودا

ليش قلت تدريجياً ..؟ لأن البيكنج صودا يكون فوار لما نضيفة للماء

لهالشي نضيفه شوي شوي .. ونخليه على النار حتى يغلي..

يكون بهالوقت الخبز تخمر نص ساعه ..

نجي لمرحلة سلق الخبز بالماء اللي حطينا فيه بيكنج صودا..

نحط كل خبزتين أو ثلاث في الماء

نخليهم 30 ثانية مو اكثر .. ونقلبهم على الجهه الثانية ونخليهم 30 ثانية بعد..

نشيلهم من الماء نستخدم المغرفة اللي زي الصفاية ( slotted spoon )

ونحاول ننتبه لشيل الخبز وتقليبه

نحطه بصينية مدهونة زيت أو على سلبات ( silpat )

مانحط ورق أبد ولابارشمينت .. والا لزق الخبز فيه ولاطلع

ندهنة بالبيض ونرش علية شوي ملح بحر

وبطرف السكين نحط علامات بسيطة أما × أو خطين زي ماانا مسوية

بس ننتبة مانعمق السكين مره

ندخله للفرن لمده مابين 15 -20 دقيقة

المهم حتى ينضج ويتحمر..

***

((( مقادير الحشوة )))

…

…

للبصل..

1 بصلة متوسطة الحجم مقطعه شرايح

1 ملعقة صغيرة سكر بني

1 ملعقة كبيرة خل بلسميك

1/2 ملعقة كبيرة زبدة

1 ملعقة كبيرة زيت زيتون

ملح وفلفل أسود

…

بيبروني الكمية حسب الرغبة

جبن مومليت

جبن إمنتال

 بيستو الفلفل الأحمر البارد

زبدة

***

للبصل..

نحط الزبدة مع الزيت على النار

نضيف البصل مع الفلفل الأسود والملح والسكر البني والخل

ونقلبه ونخليهم على نار هادية حتى يذبل البصل ويتكرمل

للبيبروني..

نصف البيبروني في صينية وندخله الفرن على درجة 180

بالنسبة للبيبروني فيه كمية دهون عشان كذا مايحتاج ندهن الصينية

راح نخليه عشر دقايق تقريباً .. المهم حتى يبدا يتحمر

نطلعه بعدها راح ينشف اكثر وراح يصير مقرمش

طبعاً لو ماحبيتوة مقرمش مره خلوة 7 دقايق بالفرن

مجرد انه يتحمر شوي وطلعوة..

***

تجهيز الساندوتش..

راح نحط شوي زبدة على الخبز ونحمصة من جوا

نحط جبن الميموليت والخبز حار حتى يذوب الجبن شوي

بعده البيبروني البصل المكرمل وجبنة الإمنتال وبعده البيبروني

واخر شي ندهن الخبز الطبقة اللي فوق بشوي بيستو

وبالعافيه..

***

كوكيز بالزبدة البنية وملح الهملايا بحشوة النوتيلا

***

***

اهلين..

نبذه بسيطة عن الكوكيز والاشياء المستخدمة بهالوصفة..

الكوكيز..

وشلون جاء الكوكيز ..؟

كان واحد من الطباخين يسوي كيك وياخذ قطعة من الكيك ويحطها بالفرن

والهدف انه يختبر درجة حرارة الفرن قبل مايخبز فية الكيكة كاملة

واختبار درجة حرارة الفرن للكيك هذا يسمى ( koekje )

وهي كلمة هولندية معناها الكيكة الصغيرة ..

وهالقطعة هي اللي صارت كوكيز .. وأنتشر بعدين

يعني الكوكيز بالأصل هولندي ..

شاع الكوكيز بالولايات المتحدة في القرن 17 .. جاء في مستوطنة إنجليزية لأمريكا

وأسمها صار بدال ( Koekje )  تغير لـ  ( cookie ) أو ( cooky )

في القرن ال 19 اشتهر الكوكيزفي  بريطانيا  ونال اعجابهم

وسمووة البسكويت أو الكعك الحلو .. زي في اسكتلندا مثلا..

***

الزبدة البنية

ومشهورة بأسمها الفرنسي (  Beurre noisette ) وتعني بالعربي زبدة البندق..

وهي زبدة عادية .. نحطها على النار حتى تذوب

وبعد فتره ينفصل زبدة الحليب عن جوامد الحليب

راح تنزل جوامد الحليب للأسفل ويقلب لونها بني

هنا الزبدة راح يكون لها ريحة مميزة وحلوة ..

طبعاً لازم وحنا نسويها نحرك وننتبه انها مجرد مايكون لونها بني

نشيلها من على النار..

وأفضل شي أننا نستخدم فلتر القهوة الورق لتصفيتها..

هالزبدة معروفة بالمطبخ الفرنسي

وكثير تدخل بالمخبوزات الفرنسية

وممكن تستخدم لحالها كصوص مع بعض الأكلات

هنـا انا استخدمتها زي الصوص ..

***

ملح الهملايا  الوردي..

هو نوع من أنواع الملح .. يجي لونة وردي بدرجات مختلفة

بعض بلوراته تميل للأحمر وبعضها ابيض زي لون الملح العادي

ألوانه المختلفه بين الأحمر والوردي والأبيض

مؤشر على انه غني بالمعادن المختلفه والحديد اللي يمدنا بالطاقه..

الملح هذا يسمى بالذهب الأبيض ..

تشكل هذا الملح  من قبل 250 مليون سنة..

من وين هالملح..؟

من منطقة الهيمالايا في سلسلة جبال كاراكورام

تقع هالجبال 400 كيلومتر من وادي هونزا في باكستان..

لملح الهملايا فوائد كثيرة ..

ومنها انه يحتوي على 84 نوع من المعادن والمعادن الخفيفة..

الملح هذا غني باليود مما يعني انه مايحتاج انه يضافله ..

يستخدم مو بس بالأكل..

لكن منه صحون وأبجورات وأشياء ثانية..

 لو حبيتوا تعرفون أكثر عنه وعن إستخداماته و فوائدة.. أكتبوا بقوقل ملح الهملايا ..

أستخدمته بهالوصفه تحديداً لأني لاحظت انه أخف من باقي أنواع الملح

طبعاً لو مالقيتوه تقدرون تستبدلونة بملح البحر العادي..

الملح هنا رشيته على الكوكيز وهو توة طالع من الفرن

تقدرون تستغنون عن هالخطوة بس الملح  معطي طعم جداً لذيذ

***

ملاحظة بسيطة..

الشكولاته اللي استخدمتها مو التشوكلت تشيبس العادية

أستخدمت شوكلاته ليندت وكسرتها قطع صغيرة بحجم التشوكلت تشيبس

برأيي انها ألذ.. ولكم حرية الإختيار..

***

***

المقادير..

2 1/4 كأس طحين

1 1/4 ملعقة صغيرة بكينج صودا

1/4 ملعقة صغيرة ملح ( استخدمت ملح الهملايا )

2 أصبع زبدة غير مملحة

1 كاس سكر بني

1/4 ربع كأس سكر

1 بيضة كبيرة + صفار بيضة

1 1/2 ملعقة صغيرة فانيلا سايلة

1 ملعقة كبيرة زبادي

3/4 كاس حبات شكولاة غامقة ( dark chocolate chips)

3/4 كاس حبات شوكولاتة بالحليب ( milk chocolate chips )

ملح هملايا

نوتيلا او زبدة الفول السوداني للحشوة

***

الطريقة..

نخلط الطحين والبيكنج صودا والملح

نحط الزبدة على النار على حرارة متوسطة ونستمر بالتحريك حتى تذوب

وراح بعدها تطلع فقاعات أو رغوة بعدها بتختفي

نخلي الزبدة على النار حتى يكون لونها بني فاتح وريحتها زي المكسرات

نشيلها من على النار وبعدها نصفيها بالفلتر الورق حق القهوة ..

وطبعاً مو ضروري بس افضل طريقة لتصفية الزبدة البنية استخدام فلتر القهوة الورق

متوفر بكل سوبرماركت تلاقونة عند قسم القهوة ..

بعد مانصفي الزبدة نخليها تبرد شوي

بخلاطة الكيك نخلط الزبدة والسكر ولما يختلطون نضيف البيض

والفانيلا والزبادي حتى يختلطون

نضيف الطحين بالتدريج والخلاطة على اقل سرعه

او ممكن نخلط بسبتيولا او اي شي ثاني

لما يمتزجون نضيف حبيبات الشوكولاتة ونخلطهم بسبتيولا او ملعقة

نلف العجين ببلاستيك تغليف ونحطة بالثلاجة ساعتين يبرد

بعد الساعتين نسخن الفرن على درجة 360 / 180

ناخذ مقدار متساوي من الخليط

( أنا استخدم ملاعق القياس الحجم الكبير كل حبة كوكيز تساوي ملعقتين )

نجي للحشوة وهي الأهم .. كيف نحط مقدار كبير من الحشوة وبسهولة

هي شيئين سويتهم وقدرت احشي بسهولة بدون مايذوب النوتيلا ويطلع من العجين

الشيء الأول أن النوتيلا لازم يكوون بارررد خليته بالثلاجة من اول ماجبته

وكل ماتحسون انها بدأ يذوب وانتم تشكلون رجعوة الثلاجة

الشي الثاني اللي يسهل عملية الحشوة هو كيف تحشون

لاتفردون الكوكيز وتحشونة لا.. أسهل نكورة وبأصبعنا نسوي تجوف بالنص

ونحط فية الحشوة ونسكره.. ونرجع نكورة شي بسيط

نصفة بصينية فيها ورق بارشمينت ونخلي مسافة كافية بين كل حبة والثانية

وندخلة الفرن من تحت بس .. لمدة عشر دقايق

بعد مانطلعه من الفرن مباشرة نرش كل حبة كوكيز رشة مره صغيرة من ملح الهملايا

بعدها نخلية على شبك التبرد..

وتمتعوا بألذ وأطعم كوكيز محشي بالنوتيلا.. : )

***