بسكويت اماريتي وزابايوني بالقهوة

بسكويت اماريتي وزابايوني بالقهوة

***

image

***

وصفتين من ايطاليا

سهلة وبمكونات بسيطة ولذيذة مره  ..

الوصفة الأولى بسكويت اماريتي من سيسلي بإيطاليا..

بسكويت مكون من الميرانج ( بياض البيض المخفوق ) وبودرة اللوز

وينكهة بنكهة اللوز .. لكن ممكن نحط معه اي نكهة ثانيه

انا أفضل نكهة الليمون لهالشي هي اللي اخترتها لهالوصفة

البسكويت يجي chewy من الداخل وكرسبي من برا وهذا اللي معطية قوام لذيذ ومختلف

اما بالنسبة للزابايوني .. هو كاسترد خفيف

من ثلاث مكونات بس صفار بيض وسكر ومنكهات

احيان يعتبر نوع من المشروبات ويقدم بكاسات مع اضافة حليب لتخفيفة

مثل مشروب ( پونشا كريما ) من فنزويلا وهو نفسه الزابايوني مع اختلاف الاسم من دولة للثانيه

انا ماحسيته حلو كمشروب الألذ يكون حلى وينأكل بالملعقة

وممكن تقدمون معه بسكويت ويكون نفس فكرة التغميسه

او حتى ممكن ينحط كصوص على الفواكة

في هالوصفة سويت الزابايوني بنكهة القهوة واستخدمت بالوصفة

كولد برو كوفي كنت محضرتها قبل لكن تقدرون تستخدمون اي نوع

مثلاً بلاك كوفي او اسبريسو .. او حتى ممكن تضيفون له اي نكهة

ثانيه اذا مو حابين نكهة القهوة..

* تنبيه بسيط: الوصفات الاساسية لبسكويت الامارايتي والزابايوني

تحتوي على الكحول كمكون أساسي للوصفتين ..

مثلاً اسم البسكويت امارايتي نسبة لنوع من الكحول يسمى امارايتو ..

فتأكدوا لو كنتوا بتجربونها بأي مكان اذا سافرتوا..

***

لبسكويت الامارايتي..

المقادير..

١ بياض بيضة

٩٠ جم دقيق اللوز

٧٠ جم سكر

بشر ليمونة

١/٤ ملعقة صغيرة فانيلا

رشة ملح

الطريقة:

نولع الفرن على درجة ١٧٠ / ٣٤٠

نجهز صينية ونحط فيها ورق بارشمينت

نخفق بياض حتى تبدأ تطلع رغوة ونضيف السكر تدريجياً

واذا انخفق زين نضيف الفانيلا ونخلط حتى نلاحظ انه اذا رفعنا الويسك

او الخلاطة يكون خليط بياض البيض بشكل منقار ويكون بشكل متماسك

هنا نوقف مانزود خلط ..

نخلط الملح مع بشر الليمونة مع دقيق اللوز

ونضيفة لبياض البيض ونخلط بحركة دائرية من تحت لفوق وبخفة

حنا نبي نخلط الخليط بدون مانطلع الهوا الموجود ببياض البيض

لما يتمزج زين نجي للتشكيل عندنا كم خيار

اما ناخذ ملعقة وناخذ شوي من الخليط ونوزعه بالصينية

او نستخدم ملعقة الايسكريم الصغيرة للخليط

او نستخدم كيس حلواني ونعصر الخليط بشكل متساوي بالصينية

والخيار الاخير نستخدم يدينا وهالطريقة حلوه بس متعبه

الخليط مره لين وراح يلتصق يعني لازم تغسلون يدينكم بعد كل ثلاث حبات هههه

بعد التشكيل نخبزة بالفرن مدة مابين ١٠ ل ١٥ دقيقة

او حتى يطلع لونها ذهبي.. نحطها على شبك تبريد ونرشها بالسكر الباودر شي خفيف

لاتكثرون لانه اصلاً حالي..

* بالنسبة للنكهات مثل ماذكرت انه بالوصفة الاساسية ينضاف نكهة اللوز

انا مااستخدمته هنا بس لو حبيتوا ضيفوا ١/٤ ملعقة صغيرة من نكهة اللوز..

***

الزابايوني

المقادير..

٢ صفار بيض

١ ١/٢ ملعقة كبيرة سكر

٢ ملعقة كبيرة قهوة مركزة

للتقديم : حبوب قهوة ملبسة بالشوكولاته ( اختياري)

الطريقة:

نجهز حمام مائي ونخليه حتى يغلي الماء وبعدها نقصر عليه

في طاسه قزاز نخلط صفار البيض والسكر زين حتى يكون لونه اصفر فاتح

نضيف القهوة ونخلط زين

نحطة فوق الماء بشرط ان قاعدة الطاسة القزاز ماتلامس الماء

نستمر بالخلط حتى يكون عندنا خليط ثقيل وسايل بنفس الوقت

 بكاسات نحط حبتين من القهوة الملبسة بالشوكولاته ونصب فوقها الزابايوني

ونقدمة مباشرة مع بسكويت الامارايتي ..

***

مكرونة الكولورجونيس

مكرونة الكولورجونيس

***

image

***

باستا من سردينيا بإيطاليا

العجينة تتكون بس من سميد و شوي طحين وماء

ينضاف لها ملح وزيت زيتون

حشوتها تكون بطاطس وجبن بيكورينو

بالنسبة للسميد المستخدم يفضل إستخدام السميد المكتوب عليه Rimacinata

وشو السميد من هالنوع؟

الكلمة ايطالية معناها معاد طحنة ..

لهالشي ميزة هالنوع من السميد انه ناعم مره..

مره هالنوع مناسب لعجينة المكرونة

طيب واذا مالقيتوا هالنوع؟

عادي استخدموا اي نوع سميد ناعم ..

***

***
للعجين:

٢٢٠ دقيق سميد

٨٠ جم طحين باستا ( 00 )

١٥٠ مل ماء

١ ملعقة صغيرة زيت زيتون

رشة ملح

الحشوة:

١٦٠ جم بطاطس ( بدون وزن القشر )

٤٠ جم جبن بيكورينو أو بارميزان مبشور ناعم

رشة نعناع مفروم ناعم ( الكمية حسب الرغبة بس لاتكثرون)

رشة ملح وفلفل أسود

شوي زيت زيتون

للصوص:

٥٠ جم زبدة

تقدرون تنكهونها أعشاب أو ثوم لو حبيتوا..

الطريقة:

اول شي نجهز الحشوة:

لكم خيارين بالبطاطس

اما تقطعونة مكعبات وتسلقونة حتى يكون لين وتهرسونه..

او انكم تشوونه بالفرن وهذي الطريقة اللي سويتها لانها ألذ..

عيبها بس انها تاخذ وقت..

طريقتها ..

تشغلون الفرن على ٢٠٠ c / ٤٠٠ f

تغسلون البطاطس زين وتجففونه

بالسكين تسوون ثقوب كثيرة بالبطاطس

تجيبون صينية وتحطون فيها طبقة من الملح الخشن ( لازم ملح خشن )

وتحطون البطاطس على الملح وتدخلونة الفرن

راح ياخذ من ساعة ونص الى ساعتين حسب حجم البطاطس

طبعاً البطاطس تخلونة بالفرن بدون ماتغطونة بأي شي هذي اهم نقطه

بعد مايبرد خوذوا منه مقدار ١٦٠ جم اهرسوه بالشوكة

واخلطوه مع الجبن والنعناع وزيت الزيتون والملح والفلفل

نجهز العجينه:

نخلط مقادير العجينة مع بعض

ونعجنها شوي بس حتى تكون عندنا عجينة متماسكة..

ماراح تكون لينه مره ولاقاسية..

نلفها ببلاستيك التغليف ونخليها نص ساعه ترتاح ( برا الثلاجة)

بعد لما ترتاح العجينة نفردها على سطح مرشوش بالسميد

ونحطها بآلة الباستا على اوسع مقاس ( ١)

ونرجع نطويها ونمررها بالآلة ونكرر هالحركة مرتين

اخر شي نفردها ( حتى مقاس ٦ او ٧ )

ونقطعها دوائر ونحشيها بحشوة البطاطس

وافضل شي حتى تضبطون الحشوة والشكل شوفوا فيديو باليوتيوب

اكتبوا Culurgiones pasta

وشوفوا كيف طريقة الحشوة واللف

نسلقها في ماء حار مره مع ملح

لمدة مابين ٣ الى ٤ دقايق

وفي هالوقت نكون مجهزين الصوص..

الصوص:

على نار متوسطة الى عاليه

نذوب الزبدة ونخليها خمس دقايق تقريباً

او حتى يبدأ يتغير لونها للبني

نشيلها ونصفيها ( أفضل شي لتصفية الزبدة البنية فلتر القهوة الورقي)

نرجعها على النار حتى تسخن ونقلب فيها الباستا دقيقة تقريباً

ومثل ماقلت ممكن الصوص يتنكهة الأعشاب او الثوم حسب الرغبة..

ونقدمها … وممكن نزينها بجبن بيكورينو او بارميزان مع التقديم
اوتتقدم مثل ماهي..

وبالعافية..

فطيرة الدجاج والجلاش

فطيرة الدجاج والجلاش

***

 image

***

فطيرة سهله سريعة

مااتقيد فيها بمقادير معينة مع ذلك

حاولت اكتبها بالضبط وبكميات محدده

لكن لكم الخيار في اختيار المكونات

يعني حاولوا ماتتقيدون أبدعوا وسووها بالمكونات اللي تفضلونها

سويتها لانها لذيذة وحتى استفيد من باقي البطاطس

اللي سويته في وصفة كور البطاطس

 

المقادير:

  •  للدجاج:

    ٢ حبة صدور دجاج حجم كبير

    ١ حبة بصل متوسط الحجم

    ٢ حبة جزر

    ٣ حبة ورق غار

    ١ عود قرفة

    ٣ حبات هيل

    ٤ حبات قرنفل

    ١/٢ ملعقة صغيرة كزبرة حب

    عصير نصف ليمونة

    عود أكليل الجبل

    ملح وفلفل أسود

    ماء لسلق الدجاج

    +

    ١ ملعقة كبيرة زبدة غير مملحة

    ١ فص ثوم صغير مهروس

  • باقي المكونات :

    ٢ حبه جزر مقطع

    حبه صغيرة شمر مقطعه شرايح

    حبة بصل كبيرة مقطعة شرائح رفيعة

    ١ حبه بطاطس متوسطة الحجم

    ( استخدمت باقي البطاطس المستخدم في وصفة كور البطاطس)

    زبدة وزيت زيتون

    ملح

    اكليل الجبل مفروم

    فص ثوم صغير مهروس

  • للصوص:

    ٢ ملعقة كبيرة لبنه

    رشة ملح

    ملعقة صغيرة بقدونس مفروم

  • للتغطية:

    من ٨ الى عشر ورق جلاش

    ٥٠ جم زبدة

    ١/٢ ملعقة صغيرة بابريكا مدخنة

الطريقة:

١/ للدجاج .. نسلق الدجاج مع جميع المكونات ( ماعدا الزبدة والثوم)

اذا صار الدجاج جاهز نفتته

وفي مقلاية نذوب الزبدة ونضيف الثوم والدجاج

نقلب كم دقيقة حتى يبدأ يتحمر الدجاج شوي

مانخليه فترة طويلة حتى ماينشف

٢/ نسلق البطاطس حتى يبدأ يلين ( مدة مابين ٨ الى عشر دقايق)

نقطعه مكعبات صغيرة ..

في قدر نحط شوي زبدة والثوم واكليل الجبل

نقلب الجزر شوي ونضيفلة البطاطس

نقلبهم على نار متوسطة كم دقيقة حتى تبدأ تتحمر

نشيلهم من على النار ونحطهم بصحن

في نفس القدر نحط شوي زيت زيتون ونقلب البصل حتى يذبل

نضيفلة الشمر ونقلبة كم دقيقة بس

نضيفلهم البطاطس والجزر نقلبهم مع بعض ونملحهم

ونخليهم على جنب حتى نحضر الصوص

نخلط مقادير الصوص مع بعض

ولو كان مره ثقيل نزود لهم زيت زيتون شوي

نجهز صينية

نحط شوي صوص وبعدها الخضار وبعدها صوص وبعدها الدجاج

٣/ نجهز الجلاش

نذوب الزبدة ونخلط معها البابريكا المدخنة

في الصينية نحط طبقة من الجلاش وندهنها بالزبدة

ونحط الطبقة الثانية وندهنها ونستمر بهالطريقة حتى اخر طبقة

طبعاً عدد الطبقات اختياري تحبون اكثر زودوا واذا اقل قللوا العدد

ندخلها في فرن مشغل بقبل عشر دقايق

 على درجة ١٨٠ لمدة تقريباً نص ساعه

المهم حتى يتحمر الجلاش

وبالعافية..

***

ملاحظات:

١/ لاتنسون تغطون الجلاش وقت استخدامها بفوطة مبللوله بالماء

حتى ماتنشف وتتكسر

٢/ تقدون تغيرون بالمقادير مثل ماتحبون

اختاروا الخضار اللي تبون

وممكن تضيفون اي نوع جبن او اي صوص ثاني بدال صوص اللبنه

او حتى ممكن تضيفون كريم طبخ يعطيها طعم لذيذ بعد

انا احب اللبنه واحسها اخف لهالشي استخدمتها..

***

كرات البطاطس (بوم بغيزيين)

كرات البطاطس (بوم بغيزيين)

***

image

***

طبق فرنسي عبارة عن كرات بطاطس

تتسوى كرات البطاطس بنفس الاداة اللي نستخدمها للفواكة حتى تطلعها لنا كور

واللي تسمى ب ( melon baller )

تنسلق وتتقلب بزبدة مصفيه حتى تتحمر

حلو يقدم كطبق جانبي مع اللحوم او البرجر مثلاً..

الطريقة سهلة جداً..

راح تحتاجون :

٢ حبة كبيرة بطاطس

ملعقة كبيرة زبدة مصفية ( clarified butter )

ملح

اعشاب حسب الرغبة

( استخدمت روزماري. طازج وبقدونس مجفف )

فص ثوم صغير ( حسب الرغبة )

الطريقة:

راح نستخدم الاداة اللي تطلع لنا الفواكة والجح كور

ونسوي كور من البطاطس

نحط الكور في ماء بارد فتره خمس دقايق

ونحتفظ بباقي البطاطس مانرمية ( بنستخدمة بوصفة ثانيه )

بعدها نسلق البطاطس بماء حار مدة مابين عشر دقايق الى ١٢ دقيقة

حتى يلين.. بعدها نطلعه ونخلية على صفايه حتى يجف

في مقلاية نحط ملعقة زبدة مصفيه ( تقدرون تستخدمون الزبدة العادية او السمن )

نضيف الأعشاب  والثوم والبطاطس والملح ونقلب حتى تتحمر كور البطاطس

من كل الجهات ويكون لونها ذهبي..

وبالعافية..

بانيللي

بانيللي

 

image

***

البانيللي من ايطاليا تحديداً من سيسلي( صقلية )

عبارة عن عجينة حمص تقطع مربعات وتنقلي

ياكلونها مثل ماهي او يحطونها بخبز برجر

ومثل كثير اكلات تطورت ساندوتشات البانيللي خصوصاً برا ايطاليا

وصارت الحشوة بالبانيللي بالإضافة إلى الجبن والصوص والخضار المقلية

تعتبر هالأكلة من الستريت فود بإيطاليا

ومثل اغلب أكلات سيسلي يقال ان اصولها عربية

في هالوصفة بالذات لازم تختارون دقيق الحمص بعناية

لانه مره يختلف الطعم من نوع للثاني..

اختاروا نوع ممتاز .. والطعم بيكون لذيذ..

***

المقادير:

١ كاس دقيق الحمص

٢ كاس ماء بدرجة حرارة الغرفه

١/٢ ١ ملعقة كبيرة بقدونس مفروم

ملح وفلفل أسود

زيت للقلي

ليمون وبقدونس للتزيين

الطريقة:

نجهز صينية ماتكون عميقة وندهنها بالزيت ونخليها على جنب

في قدر نخلط دقيق الحمص والماء والملح بالويسك

حتى تمتزج زين ومايكون فيه قطع

نحطة على نار متوسطة ونخلط بالويسك حتى يبدأ يثقل

نضيف فلفل أسود والبقدونس ونحرك بملعقة خشب

حتى يثقل الخليط ..

نصب الخليط بالصينية ونساوي السطح

ونخلي الخليط يبرد تماماً بعدها نقطعه مربعات او مستطيلات

حسب الشكل اللي تحبون

image

بعدها نقليها بزيت عميق حتى يكون لونها ذهبي..

تنأكل دافية..

بالعافية..

كالبوراباستي ( كوكيز تركي )

image
*لا أسمح بنقل الموضوع لأي مكان أخر..

كالبوراباستي ( كوكيز تركي )

كالبوراباستي من الحلويات التركية اللذيذة مره

عجين محشي بالجوز..

ينخبز بعدها يتغطى بالسيرب..

غيرت بالعجين شوي وغيرت بالحشوة واضفت لها السمسم والسكر..

سبب اضافتي للسكر انه السيرب مايعطي الكوكيز حلا كافي

والعجينة مافيها سكر فالسكر بالحشوة راح يوازن الطعم..

لكن تقدرون تستغنون عنه..

المقادير:

للعجين:

٤٠ جم حليب كامل الدسم

٣٠ جم زيت

١ ملعقة كبيرة زبادي كامل الدسم

١ ملعقة كبيرة سميد

٦٠ جم زبدة بدرجة حرارة الغرفه

٣/٤ ملعقة صغيرة بكينج صودا

١ ٣/٤ كاس طحين

رشة ملح

للسيرب:

١ كاس ماء

١ كاس سكر

١ ملعقة صغيرة عصير ليمون

للحشوة:

١ كاس جوز مجروش

١ ملعقة كبيرة سمسم

١ ١/٢ ملعقة صغيرة سكر بني

للتزين :

فستق مطحون

الطريقة:

اول شي نجهز السيرب

نخلط السكر والماء ونخليهم على نار متوسطة حتى يذوب السكر

نضيف الليمون ونخليه حتى يغلي الماء

نخليه يطبخ بعد الغليان لمدة خمس دقايق على النار نشيله ونخليه حتى الحاجة..

الحشوة: نخلط المكونات مع بعض

وبالنسبة للعجينة..

نخلط الحليب والزيت والزبدة والزبادي مع بعض

ونخلط الباقي مع بعض ( السميد والملح والبيكنج صودا والطحين )

نضيف خليط الطحين على خليط الحليب والزبدة.. ونعجن حتى تمتزج المكونات مع بعض

لو حسينا العجينة جافة مره نزود شوي زبادي ونرجع نعجن حتى يمترج زين  ..

نقسمها لكور متساوية نفرد كل كورة على اي شبك حتى يعطيها شكل منقط جميل

نحشيها بمقدار ملعقة صغيرة ونسكرها

ونحطها بصينية فرن ( ندهن الصينية او نحط عليها ورق بارشمينت )

ندخلها بفرن مشعل من قبل على ١٨٠ درجة ونخبزها حتى يكون لونها ذهبي

تاخذ مدة مابين ( ١٥ / ٢٠ ) حسب الحجم

اول مانطلعها من الفرن نحطها بصحن عميق

ونصب عليها السيرب كم مره حتى تتشرب زين

نخليها حتى تبرد تماماً ونزينها بالفستق .. وبالعافية..

***

القوا باو

* ملاحظة: لاأسمح بنقل مواضيع المدونة إلى أي مكان اخر..

القوا باو

image

***

اهلين..

تدوينة جديدة ورجوع للتدوين من جديد..

كثير أسئلة جتني عن سبب انقطاعي عن المدونة..

للأسف وقتي جداً ضيق والتدوين وكتابة المواضيع تحتاج دقة وتفصيل وشرح كثير

وهالشي ياخذ مني جهد و وقت كبير..

خصوصاً اني مااحب اكتفي بكتابة الوصفة بدون شروحات وتفاصيل تفيد بالتطبيق..

هذا بالإضافة الى انه هدفي اتعلم مو الهدف اني انقل الوصفات وبس ..

الهدف اكون متمكنه لدرجة كبيرة وعندي خبرة كافيه حتى اقدر افيد غيري ..

وخصوصاً اني اغلب الأكلات اللي احطها صعب مره تنفيذها ..

بعد وصول مدونتي ل مليون ونص مشاهدة خلاني افكر بعدد الناس المستفيدين

بالرغم من تقفيل المدونة سنة ونص واهمالها فترة وقلة المواضيع الجديدة..

لهالشي قررت ارجع انزل بعض الوصفات ..

لكن راح اكتفي بالوصفات السهلة واللي يقدر اي احد مبتدىء يسويها..

***

راح ابدأ بوصفة الباو..  بما انه كثير طلبوا وصفته..

الباو او القوا باو ..

برغم انها تعرف بأسم باو ( bao )

لكن لها اسماء مختلفة مثل البرجر التايواني او الباو المطبوخ بالبخار.

هو خبز نصف بيضاوي محشي ..

يطبخ الخبز بالبخار وتختلف انواع حشواته مابين اللحوم والخضار

لكن الغالب برا تكون الحشوة ( پورك )

ينحشى بعد مايبرد ويجف ويكون هش وخفيف

يعتبر من الستريت فود في الصين وتايوان

وطبعاً ينأكل كسناك..

كيف يتسوى ،،؟

الفكرة انه ناخذ قطعة من العجينة ونكورها

ونفردها بشكل بيضاوي وتطوى بالنص

ونحطها بالبامبو ستيمر ( bamboo steamer )

تنطبخ على البخار ونخليها حتى تنضج..

بعدها نحشيها بالحشوة اللي نبي ..

هنا انا حشيتها بلحم الغنم المشوي..

كيف نستخدم البامبو ستيمر؟

بما اني استخدمته بهالوصفة ولاحظت ان الأغلب مايعرفون كيفية استخدامه

راح اشرح كيف نستخدمة ..

نجيب مقلاية او قدر مايكون عميق

نملاة بالماء تقريباً ٢ او ٣ انش

نخلي الماء حتى يكون حار ويتبخر بس بشرط مايكون يغلي

نحط ورق بارشمينت او اي نوع خضار بكل طبقة من الستيمر

نوزع الأكل جوا الستيمر ونغطية ونحطة جوا القدر اللي فيه الماء

و نخليه حتى ينضج الأكل..

وبس هذا هو بكل بساطة..

من النقاط المهمه بإستخدامه:

١/ ان الماء مانكثرة عن ثلاثه انش حتى مايلامس الأكل..

٢/ اطراف البامبو ستيمر لازم ماتلامس اطراف المقلاية او القدر بدون ماء والا احترق..

٣/ يختلف نوع المكون اللي نحطة بأسفل البامبو ستيمر حسب اختلاف الأكلة..

بهالوصفة استخدمت ورق البارشمينت ..

تابعوا معي المقادير والطريقة..

الكمية:
مابين ١٤ الى ١٦ حبة

image

المقادير:

٥٠٠ جم طحين أبيض

٥٠ جم سكر

٥ جم ملح

٤ جم بكينج باودر

٥ جم خميرة

١٤٥ مل ماء بدرجة حرارة الغرفه

١٤٥ مل حليب بدرجة حرارة الغرفه

١٥ مل زيت

الطريقة:

بوعاء نحط الطحين والسكر والملح والبكينج باودر والخميرة

( ننتبه مانحط الخميرة مباشرة على الملح)

نضيفلهم الماء والحليب والزيت ..

نخلطهم زين .. وبعدها نحطهم على سطح نضيف ونعجن لمده مابين ١٠ الى ١٥ دقيقة

حتى تكون عندنا عجينة لينة وماتلزق بالسطح ..

نحط العجينة بوعاء مدهون بالزيت ونغطيها حتى يكون حجمها الدبل..

بعدها نقسم العجينة لقطع متساوية ( مابين ١٤ الى ١٦ قطعه) تقريباً كل قطعة ٦٠ جم

نكور كل قطعة وبعدها نفردها بشكل بيضاوي

ندهن سطح كل قطعة بزيت ونطويها بالنص راح يكون عندنا شكل نصف بيضاوي

نحط كل قطعة من العجينة على ورق بارشمينت ونحطها بصينية

ونغطيها ونخليها ترتاح من ثلث لنصف ساعه

بعدها نجهز الستيمر اي كان نوعة .. مثل ماذكرت انا استخدمت البامبو ستيمر

نحطه في قدر فيه ماء حار مره يتبخر منه الماء لكن مايغلي..

نوزع الباو بالتساوي على طبقات الستيمر ..

ونخليها مدة مابين ١٥ الى ٢٠ دقيقة..

طبعاً بنلاحظ انها تضاعفت وكبر حجمها شوي..

نشيلها من الستيمر ونخليها تبرد ونحشيها بالحشوة اللي نبيها..

***

image

***

هنا سويت نفس العجينة لكن اضفت لها البنجر

ملاحظة:

١/ تقدرون تستخدمون اي نوع من الستيمر مو لازم البامبو ستيمر

٢/ الباو تقعد لثاني او لثالث يوم عادي بدون ماتتغير

لكن بشرط انه تكون بمكان بارد ( مو ثلاجة) وتحطونها بكيس محكم الاغلاق..

٣/ لازم لازم لازم نستخدم ورق بارشمينت مو اي نوع ثاني حتى مايلزق العجين بالورق..

image

شكشوكة

شكشوكة

***

image

***

تكفي ٣ أشخاص..

المقادير..

زيت زيتون + زبدة

٦ حبات بيض

١ بصلة متوسطة مفرومة

١ طماطم ايطالية معلبة نقطعها صغير

ربع حبة فلفل أحمر بارد مقطع شرائح رفيعة

٢ فص ثوم مهروس

١ ملعقة صغيرة زنجبيل مبشور ناعم

٨ أوراق كبيرة ريحان مفرومة ناعم

١ ملعقة صغيرة كراويا حب ( اختياري )

١ ملعقة كبيرة سكر بني

ملح / فلفل أسود

جبن ماعز ( فيتا )

جبن بارميزان

فلفل حار ( حسب الرغبة )

اوراق ريحان او بقدونس او كزبرة للتزيين

الطريقة:

في مقلاية كبيرة نحط تقريباً ملعقة كبيرة زيت زيتون وملعقة كبيرة زبدة

نضيف البصل ونقلب خمس دقايق تقريباً .. حتى يذبل

نضيف الثوم والزنجبيل ونقلبهم شوي على النار

نضيف الكراويا والفلفل الأحمر بعدها نضيف الطماطم والريحان

نقلبهم دقيقتين ونضيفلهم السكر والملح والفلفل الأسود..

نغطيهم ونخليخم على نار متوسطة من خمس لعشر دقايق

حتى يذبل الفلفل البارد شوي ويقل الماء

نضيف البيض ونغطيه ..

نخليه حتى يوصل درجة النضج المناسبة اللي تحبونها..

نضيف ملح وفلفل أسود والفلفل الحار ونوعين الجبن واوراق الريحان..

***

تشلبر .. بيض بالطريقة التركية

تشلبر .. بيض بالطريقة التركية

image

***

تشلبر .. طبق تركي بسيط وسهل ..

يرجع للقرن الخامس عشر في عهد السلاطين العثمانيين ..

الطبق عبارة عن بيض مسلوق بدون قشر .. زبادي مخفوق بالثوم

وفوقة زبدة مذوبة مخلوط معها الفلفل الحلبي او البابريكا..

***

المقادير : ( لشخصين )

٤ بيضات

١ ملعقة كبيرة خل

فلفل أسود وملح بحري

 –

١ ١/٢ علبة زبادي

١ فص ثوم كبير مهروس

ملح بحري

١/٤ أصبع زبدة

٢ ملعقة كبيرة زيت زيتون

١ ملعقة صغيرة بابريكا مدخنة

كراث مفروم ( أو نعناع حسب الرغبة)

فلفل أسود

***

الطريقة:

للبيض:

نجيب قدر يفضل واسع وعميق شوي ..

نملاه ماء ونحط الخل ونتركة حتى يغلي على حرارة متوسطة

نخفض الحرارة .. ونكسر كل بيضة بصحن لحال ..

بملعقة خشب نحرك الماء حركة دائرية وبعدها ننزل البيضه بالدوامة

نخلي البيضة من دقيقتين لثلاث لو بغينا الصفار سايل..

او خمس دقايق لو بغينا البيض مستوي بالكامل..

بعدها نطلعها ونخليها تجف من الماء الزايد على ورق تجفيف

نضيف لها فلفل أسود وملح..

نشيل لو فيه قطع بيض على سطح الماء..

ونكمل البيض بنفس الطريقة..

حتى تتضح لكم طريقتة شوفوا اي فيديو باليوتيوب يوضح الطريقة

اكتبوا poached eggs recipe

نخلط الزبادي مع فص الثوم المهروس والملح

نذوب الزبدة ونضيف لها البابريكا

ونخليها دقيقتين تقريباً على نار هادية لمتوسطة

نشيله من على النار ونضيف زيت الزيتون

التقديم:

نجيب صحنين نحط الزبادي اول شي

ونخلي شوي نحطة حوالي البيض

نحط فوقة البيض وحوالينة باقي الزبادي

نرش شوي من الفلفل الأسود او الفلفل الحار ( حسب الرغبة)

نضيف الزبدة بالبابريكا ..

ونزينه بالكراث او النعناع او اي نوع اعشاب

نقدمة مع الخبز المحمص ..

ملاحظات..

١/ البيض لو جديد انتاجة مايحتاج تحطون خل مع الماء..

٢/ الزبادي كميتة وكمية الثوم حسب الرغبة..

وممكن حتى تلغون الثوم لو ماحبيتوه

بس اكيد ماراح يطلع طعمه مثل اللي فية ثوم..

٣/ البابريكا المدخنة ممكن تستبدلونها بالبابريكا العادية او الفلفل الحار..

٤/ كمية الزبدة والزيت انا قللتها .. الكمية نفس الشي حسب الرغبة..

***

حلاوة اللبنية

 

حلاوة اللبنية

image

 

اللبنية الحجازية

اللبنية من الحلويات السعودية المشهورة بمنطقة الحجاز وتحديداً مكة..

تقدم بعيد الفطر مع حلويات ثانية مثل التعتيمة ..

مكونها الأساسي الحليب الباودر ..

يقال ان اصل اللبنية من الهند لانها تشابه بعض انواع الحلويات الهندية

مثل ( Barfi / و kesar peda / و kalakand ) وغيرهم

اتذكر ذقت اللبنية زمان لما كنت صغيرة ..

واللي سويتها ذكرتني بالضبط بنفس الطعم اللي اتذكرة زمان ..

الوصفة سهلة والأهم انها بدون دهن

على خلاف الوصفات الثانية

واللي تحتوي على كمية كبيرة من السمن او الزبدة..

***

المقادير:

١ كاس سكر

١كاس ماء

١ ملعقة صغيرة هيل

٤ كاسات حليب باودر

١ ملعقة كبيرة ماء الكادي

الطريقة:

نحط السكر والماء والهيل وماء الكادي على نار هادية حتى يذوب السكر تماماً

نرفعه من على النار ونضيف الحليب تدريجياً ونحرك بالمضرب اليدوي

نحطة في قوالب او صينية مدهونة بالزيت ولما يبرد نقطعة ونزينه بالفستق..

او ممكن ننتظرة حتى يبرد ونسوي منه كور صغيرة ..،

يحفظ بالثلاجة..

***

ملاحظة: لاأسمح بنقل أي موضوع في المدونة إلى أي صفحة أو حساب آخر..