بيكان باي

بيكان باي

أهلاً بتدوينة جديدة..

بصراحة أشتقت للتدوين مره وشفت هالوصفة تحمس لرجوعي للتدوين لأن فيها تفاصيل كثيرة ..

لو تبون تسوون ألذ پيكان پاي أتبعوا هالطريقة بالتفصيل..

الطريقة اللي يميزها طعم الميبل سيرب

وهنا يجي دوركم بأن تختارون النوع اللي طعمه حلو وقوي .. وللي يبون طعمه واضح بس خفيف بكتب لكم تعديل بالكميات بالملاحظات آخر شي..

وشي الميزة الثانيه ؟

الكرست .. ويمكن أنا عندي الكرست أهم بعد من الحشوة

لازم يكون لذيذ ويتفتت وخفيف..

جربت كم طريقة وهذي وحدة من أفضل الطرق اللي جربتها خفيف ولذيذ..

ماراح أطول بالكلام أقروا الوصفة وإذا عندكم أي أسئلة تقدرون تكتبونها هنا وراح أرجع أرد عليها..

المقادير :

للكرست:

٣٢٥ جم طحين منخفض الجلوتين

١٥ جم حليب باودر

٨ جم ملح

١٥ جم سكر

٢٠ جم دبس تمر

٢٢٥ جم زبدة باردة

١١٠ جم ماء مثلج

للحشوة

٢٠٠ جم بيكان مكسر

+ حبات بيكان كاملة زيادة للتغطية

١٢٥ جم ميبل سيرب

٢٥٠ جم شراب الذرة الخفيف

٣ بيضات وسط ( حوالي ١٥٠ جم )

٢ جم ملح

١٩٠ جم سكر بني رطب ( غامق)

١ ملعقة صغيرة ڤانيلا

٦٠ جم زبدة بنية

الطريقة:

للكرست:

بمحضرة الطعام نخلط الطحين والحليب الباودر والملح والسكر

نضيف الزبدة ونخلط حتى يمتزج مع الطحين تماماً ويصير مثل الحبيبات الصغيرة مره

نضيف الڤانيلا والدبس و الماء ( الماء تقريباً نضيفة كله بس نبقي كمية بسيطة للإحتياط يمكن مايحتاج نضيف الكمية كامله)

نخلط وبعدها ناخذ شوي من العجينة ونجمعها اذا متماسكة تمام وإذا تتفتت مره نزود باقي كمية الماء تدريجياً

نفردها شوي بس بشكل دائري.. على بلاستيك تغليف ونغلفها زين وندخلها الثلاجة حوالي ساعه أو لليوم الثاني..

من بكرا نطلعها قبل بحوالي خمس دقايق .. نفردها بسُمك حوالي ٣ ملم ونلبس القالب المخصص للپاي وهنا انا استخدمت قالب دائري قطره ٢٠ سم وارتفاعه ٤ سم نقطع الأطراف الزايدة وندخله الثلاجة يبرد مده أقلها ساعه..

للحشوة:

نخلط البيض ونضيف الميبل سيرب ونخلط بعدها الكورن سيرب والملح والسكر ونخلط

نضيف الڤانيلا والزبدة البنية نضيف البيكان المكسر وبعدها نصب الخليط بالقالب ( لازم القالب يكون بارد)

وشي ثاني لازم ننتبه له انه مانملأ القالب بالحشوة للأخير

نخلي حوالي ١سم أو أكثر بشوي

لأنه راح يرتفع الخليط شوي وقت الخبز

وحتى ماتطلع الحشوة برا

نصف حبات البيكان الكامله على الوجة

ندخله فرن مشغل من قبل على درجة ١٧٥ سلسيوس ٣٥٠ فهرنهايت لمدة حوالي ٤٠ أو ٥٠ دقيقة

أو لين تصير درجة حرارة الحشوة ( ٩٤ سلسيوس ٢٠١ فهرنهايت) في حال أنكم تحبون الدقة مثلي 🙂

نخليه يبرد بالقالب ..

يقدم بدرجة حرارة الغرفة وممكن يدخل الثلاجة لبكرا بس طلعوه قبل التقديم بحوالي ساعه أو أكثر..

حتى يصير بدرجة حرارة الغرفة

ملاحظات:

١/ البيكان بالحشوة المفروض يكون نيء لكن لو حمصتوة تحميص خفيف قبل مره بيفرق بالطعم ويصير ألذ..

أنا لازم أحمص اللي بالحشوة لكن الحبات الكاملة اللي أضيفها على الوجة أخليها نية لأنها بتتحمص زين مع الخَبز ..

٢/ تقدرون تقللون كمية الميبل سيرب وتزيدون كمية شراب الذرة مثلاً ٧٥ جم ميبل و ٣٠٠ جم شراب الذرة..

٣/ كمية الپاي كبيرة تقدرون تسون ٢/٣ الكمية..

٤/ تقدرون تستغنون عن حبات التزيين اللي فوق لكن يبيلكم شوي تزودون كمية البيكان بالوصفة يعني ٥٠ جم كذا ..

٥/ طريقة الزبدة البنية :

حوالي ٧٥ جم زبدة نحطها على النار ولازم لون القدر يكون فاتح حتى نقدر نراقب لون الزبدة .. راح تذوب ثم تغلي وتطلع فقاعات وبعدها راح يصير لونها ذهبي/بني ( لازم نراقبها طول الوقت ومانبعد عنها لأنها بسرعه تغمق)نشيلها من على النار ونخليها تبرد تماماً ناخذ منها مقدار ٦٠ جم للوصفة..

٦/ حتى نعطي التارت لمعة عندنا كم فكرة ممكن قبل يخلص بشوي نرشه بسكر باودر ونرجعة للفرن..

وفيه ناس يدهنونة بمربى مشمش

وفيه كم طريقة غيرهم..

بس الطريقة اللي أسويها الرهيييبة أدهنه بسولتد كاراميل أخلية خفيف شوي وأدهنه بطبقة بسيطة بس لاتكثرون حتى مايصير حالي مره..

جربوها وصحة وعافية مقدماً..

….

7 آراء على “بيكان باي

  1. شكرا لك، اعشق فطيرة جوز البقان مره وجربت كذا وصفه حتى يأست وصارت خسارة مكونات على الفاضي، وشكرا لدقة الوصف جدا مريح خصوصا بدرجة حرارة الاستواء ❤️

  2. بسالك عن الدقيق يكون خالي من الجلوتين ؟
    عندي دقيق خالي من الجلوتين وعندي الدقيق الكويتي
    اسوي مكس بينهم ولا استخدم واحد؟؟
    وشكرا ً

اترك تعليقًا

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

<span>%d</span> مدونون معجبون بهذه: