ڤيكتوريا كيك بالكرز ومربى الورد

ڤيكتوريا كيك بالكرز ومربى الورد

***

image

***

اهلاً بتدوينه جديدة ولذيذة..

وبوصفة من ألذ الوصفات للكيك الإسفنجي..

ڤيكتوريا كيك او مثل ماتسمى بعد ب ڤيكتوريا سپونج او ڤيكتوريا ساندوتش

كيكة مشهورة في بريطانيا .. جت التسمية ( ڤيكتوريا ) نسبة للملكة البريطانية ڤيكتوريا اللي كانت تحب هالكيك ..

وتحب تأكله مع الأفترنون تي .. او شاي مابعد الظهر ..

هالكيك اللذيذ عبارة عن طبقتين من الكيك الإسفنجي محشوة بمربى التوت

والكريما المخفوقه بالفانيلاً وترش بالسكر الباودر على سطحها..

هنا انا سويت تغيير بسيط بدون مايغير طعم الكيك

حطيت بالحشوة خليط من مربى الورد ومربى التوت ..

واضفت الكرز للكيك.. مازالت النكهات مثل ماهي مع تغيير بسيط اعطاها طعم ثاني..

طريقة الكيك مره متشابهه من شخص للثاني ومن شيف للثاني ..

مره هي سهله وبسيطة ومافيها اي تعقيد..

في الوصفة يستخدم الطحين ذاتي التخمير..

اللي هو طحين وبكينج باودر لهالشي كتبت لكم الكمية اذا استخدمنا طحين ذاتي التخمير او طحين عادي ومعه بكينج باودر..

وبالنسبة للطريقة فيه طريقتين ..

الأولى خلط كل المقادير مع بعض وانا مافضلتها ابد

الثانية هي اللي سويتها تابعوا الطريقة تحت..

***

المقادير:

٤ بيض بدرجة حرارة الغرفة

٢٢٥ جم سكر ناعم ( ناعم وليس باودر)

٢٢٥ جم طحين ذاتي التخمير

( أو مايعادلة ٢٢٥ دقيق عادي + ٢ ١/٤ ملعقة صغيرة بكينج باودر)

١ ملعقة صغيرة بكينج باودر

٢٢٥ جم زبدة بدرجة حرارة الغرفه + ( زيادة لدهن الصينية)

١ ملعقة صغيرة فانيلا

حليب كمية قليلة يمكن نحتاجها او لا

للحشوة والتغطية:

مربى توت + مربى ورد ( تقدرون تكتفون بمربى التوت )

كريما مخفوقة بالفانيلا

سكر باودر للتغطية

كرز ( اختياري)

***

الطريقة:

نسخن الفرن على درجة ( ١٨٠ c / ٣٥٠ f )

ندهن بالزبدة صينيتين بمقاس او بقطر ٢٠ سم ( هنا انا استخدمت ٣ صواني بمقاس أصغر )

ويفضل وضع ورق بارتشمنت دائري اسفل صينية الخبز..

بوعاء نحط الزبدة والسكر ونخلطهم حتى يكون عندنا خليط كريمي ..

نضيف البيض والفانيلا ونخلط بعدها نخلط الطحين والبكينج باودر ونضيفهم تدريجياً على الخليط..

المفروض يكون عندنا خليط ثقيل وبنفس الوقت لو رفعنا السبتيولا او الويسك يطيح الخليط

بمعنى انه مايكون ثقيل مره ويمسك بالسبتيولا..

لو كان ثقيل وش نسوي..؟ نحط ا ملعقة كبيرة حليب ونخلط

ولو بقى ثقيل نزود ملعقة ثانيه حتى نوصل للقوام المطلوب ..

لاتزودون كثير ولاتخلون الخليط خفيف لانه خليط هالكيك اصلاً ثقييييل

المهم يكون عندنا خليط ثقيل وبنفس الوقت مو متماسك  ..

نخبزة في الفرن لمدة مابين ٢٠ الى ٣٠ دقيقة

نشوف عن الخليط بعد ٢٠ دقيقة بدون مانفتح باب الفرن انتبهوا تفتحونه قبل يخلص الكيك ..

راقبوا نضج وتحمر الخليط وباب الفرن مسكر ..

اذا مرت المدة المحدده ٢٥ دقيقة مثلاً ولاحظتوا انه تحمر هنا تقدرون تشوفون عنه

اذا جهز الكيك طلعوة من الفرن وخلوه يبرد تماماً بعدها احشوه

بطبقة من المربى وطبقة من الكريما المخفوقة ويزين بالسكر الباودر مع الكرز

وممكن تثبيت الكرز بالكريما المخفوقة..

تقدرون تقدمون الكيك علطول او تدخلونه الثلاجة حتى وقت التقديم..

وحسب مالاحظت انه ألذ لما يبرد تماماً وحتى جربته بعد بيوم طلع أحلى بكثيررر ..

المهم يغلف ززززززين بالثلاجة ..

وبالعافية …

***