بانكيك الريكوتا مع زبدة الهونيكوم

***

***

نرجع للتدوين من جديد..
وبوصفة مميزة جديدة..
هذي من ألذ وصفات البانكيك اللي ممكن تجربونها ..
لذيذة جداً.. ومره خفيفة وهشه..😋👍🏻
الوصفة هذي وصفة شيف بيل جرانجر لها أكثر من عشرين سنه.. واللي اشتهر بتقديمها بمطاعمه بسيدني ولندن واليابان..
اللي يميز الوصفة انها لذيذة هشة مره خفيفة وسهله ..
غيرت شوي بالوصفة مو لأنها تحتاج تعديل لا بس سويتها بطريقة أنسب لي وأسهل..

..
قبل أبدأ بشرح الطريقة..
بعطيكم نبذة بسيطة عن الهونيكوم honeycomb ..
هو نوع من الحلويات يتسوى من السكر مع الجولدن سيروب او العسل او حتى الكورن سيروب..
يغلي على النار واخر شي ينضافله بيكربونات الصودا راح يطلع فقاعات كبيره نصبة في صينية ويترك حتى يتماسك ويتكسر ..
ممكن يكون زينه للحلويات او حتى ممكن نغمسه بالشوكولاته وناكله كذا او ممكن نسوي منه ايسكريم مثلاً..
بنزل طريقتة قريب في تدوينه ثانيه..
ممكن تسوونه طرقة بالنت كثيرة..
أو أسهل وأسرع تقدرون تستخدمون شوكلاتة كرنشي ..

***
المقادير..
للبانكيك..
٢٥٠ جم جبن ريكوتا
٤ بيض صغير مفصول الصفار عن البياض
٣/٤ كأس حليب كامل الدسم
١ كأس طحين ( يفضل نسبة البروتين فيه منخفضة )
١ ملعقة صغيرة بيكنج باودر
رشة ملح
لزبدة الهونيكوم..
٥٠ جم زبدة بدرجة حرارة الغرفه
١ ملعقة صغيرة عسل
٢٠ جم هونيكوم
للتقديم..
سكر باودر
ميبل سيروب

***

الطريقة:
للزبدة:
الزبدة لازم نسويها قبل بيوم
نضيف العسل للزبدة ونخلطه زين
نطحن الهونيكوم ناعم ونضيفة للزبدة
نحطه ببلاستيك تغليف ونسويه مثل الأسطوانه
وندخله الثلاجة لوقت التقديم..
وطبعاً لازم تكون متماسكة وبارده تماماً..
للبانكيك..
نخلط صفار البيض والريكوتا زين
نضيف لهم الحليب
ننخل الطحين والبيكنج باودر والملح
نضيفهم لخليط صفار البيض والريكوتا
نخلط زين حتى تمتزج كل المكونات
نخلط بياض البيض حتى نوصل لمرحلة ( منقار الطير)
وهي المرحله اللي اذا رفعنا فيها الخلاط يكون بياض البيض مثل المنقار ..
نضيف بياض البيض على الخليط السابق على مرحلتين
ونحرك بخفه وحركة دائرية من تحت لفوق
في هالنقطة شفت كثير من الناس ومنهم الشيف بيل لما سوا البانكيك .. لاحظتهم يخلون بعض من بياض البيض كتل بدون مايمتزج كلياً مع الخليط..
انا اللي سويته واللي افضله انه نمزج البياض كلياً
نجهز صاج او مقلاية كبيرة..
ندهنها بزبدة مسحة خفيفة
لغرف البانكيك استخدمت كاس المقاسات حجم ١/٣ كاس
طبعاً انا اخترت الحجم المناسب وطبعاً انتم تقدرون تستخدمون اللي يناسبكم ..
نحط بالمقلاية ثلاث كميات بس مو اكثر
اهم شي لا تزحمون المقلاية بأكثر من ثلاث..
نخليها على نار متوسطة.. من الجهة الأولى تقريباً دقيقتين او حتى نرفعها شوي ونشوفها تحمرت ونقلبها ونخليها من دقيقة ونص لدقيقتين مع الجهة الثانيه..
طبعاً لاتقيدون بالوقت لانه شي تقريبي..
يختلف حسب سماكة البانكيك وحرارة المقلاية وغيرة..
نحطة بصحن التقديم..

ونرشة بالسكر الباودر ونحط عليه شريحتين صغار من زبدة الهونيكوم..

قدمتة مع الميبل سيروب ..

***

ملاحظة:

تقدرون تسوون الخليط قبل بيوم وتدخلونة الثلاجة لبكرا..

***