الكراميل المملح
***
***
السلام عليكم..
اعتذر عن انقطاعي عن المدونة ..
وشاكرة لكم حماسك حتى ارجع اكتب فيها مثل اول..
ومبسوطة اني عرفت وش كثر مستفيدين منها وهذا المهم عندي..
واكيد راح احاول اكتب فيها من جديد ..💕
….
*** *** ***
الكراميل المملح من الاشياء اللي احبها كثير ..
وقبل اسوية ترددت ماتوقعت انه ممكن يكون مثل اللي اجيبه جاهز..
لكن النتيجة انه ألذ بكثير 😋
ومجرد ماتسوونه مره اكيد راح تعيدون التجربة ..
لكن بوضح شي مهم بمستوى سهولته
من ناحية التنفيذ سهل لكن يبيله دقة ولازم تتقيدون بكل شي اكتبه في الطريقة..
مو بس حتى يكون لذيذ لا القوام مهم مره ..
المفروض يكون لين بس متماسك مايذوب ولا يتلزق
بمعنى لما اجي اكله تكون الورقه نظيفة بدون مايكون فيه اي بقايا كراميل باقية بالورقة..
وبنفس الوقت المهم مايكون قاسي مانقدر ناكله ..
كيف نحقق كل هالاشياء ..؟ بدرجة الحرارة ..
تابعوا الوصفة وتفهمون اكثر ..💕
* * *
*** *** ***
– المقادير :
٢٥٠ مل كريم
٧٠ جم زبدة
١ ملعقة صغيرة ملح
١ ١/٢ كاس سكر
١/٤ كاس شراب الذرة الخفيف
١/٤ كاس ماء
ملح بحري للتغطية ( اختياري)
– – – – – –
– الادوات المستخدمة:
ترمومتر لقياس الحرارة
ورق واكس wax paper
صينية بحجم 12×26 تقريباً
زيت لدهن الورق والصينية
*** *** ***
*** *** ***
الطريقة:
١/ ندهن الصينية بشوي زيت ونغلفها من جميع الجهات بورق بارشمينت او واكس ..
وندهن الورق بعد بلمسة خفيفة زيت ( مانكثر )..
٢/ نغلي السكر وشراب الذرة والماء في قدر عميق شوي ويفضل قاعدتة ثقيلة..
٣/ نحرك السكر حتى يذوب تماماً مجرد مايذوب نوقف التحريك
وقتها نحرك القدر نفسه حركة دائرية بخفه من فترة
حتى يبدأ يتكرمل السكر ويصير لونة ذهبي..
٤/ في هالأثناء ووقت ماننتظر السكر يتكرمل نخلط الكريم والزبدة والملح
نحطة على النار حتى يغلي ونشيله من على النار..
٥/ بعدها نضيف خليط الكريم على السكر المتكرمل
( ويفضل تكون النار هادية)
وفي هاللحظة لازم نكون حذرين مره لانه راح يطلع فقاعات كبيرة وكثيره
وراح يغلي ويرتفع الخليط بسرعه ( لهالسبب ذكرت انه نستخدم شي عميق )
شوي راح تبدأ تختفي الفقاعات نرفع النار شي بسيط ( متوسطة الى هادية)
نحرك الخليط علطول.. ونخلي الخليط على النار حتى تكون درجة حرارتة 250 F
راح ياخذ مدة مابين ٢٠ الى ٣٠ دقيقة تقريباً
طبعاً كتبت المدة للتوضيح بس
مثل ماذكرت التقيد بدرجة الحرارة هو اساس نجاح هالوصفة..
نصب الخليط بالصينية ونتركه في مكان بارد ( مو بالثلاجة )
لمدة من ساعتين لاكثر ( افضل اخليه خمس ست ساعات) ..
بعدها نوزع عليه شوي من الملح البحري
نقطعه مربعات او مستطيلات حسب مانحب ..
ونغلف كل وحدة بورق واكس ..
…………………………………………………..
وصفات راوية 
الكريم المقصود بها كريم.خفق او لا ؟؟
نفس السؤال، الكريم المستخدم كريمة الخفق؟
لو سمحتي ممكن اعرف وين اقدر احصل شراب الذرة ؟ ^^”
معليش عندي سؤال شاطح ، من فين احصل زي هذا الورق في السعودية