قلاب جامون 

***

***

أهلين ..

القلاب جامون Gulab Jamun

من الحلويات المشهورة في شبة القارة الهندية ( الهند , باكستان , بنجلادش…)

تقدم غالباً بالأعياد والأعراس..

عبارة عن كور المكون الرئيسي فيها الحليب لذيذة وتذوب بالفم

وش معنى قلاب جامون ..؟

بالهندي او الاوردو معنى قلاب ( ماء الورد ) وجامون ( التوت ) ..

طيب وشو اهم مكوناته و نوع الحليب المستخدم فيه ..؟

نستخدم الكويا Khoa

وهو منتج من الألبان يستخدم بكثرة بالهند وباكستان

يشبة جبنة الريكوتا بس اقل رطوبة ..

بما انه ماعندنا هنا الكويا راح نستخدم الحليب الباودر

..

***

((الخطوات لازم ننفذها بالضبط ونتقيد فيها ))

***

المقادير..

2 كاسين حليب باودر

2 ملعقة صغيرة زبدة بدرجة حرارة الغرفة

3 ملاعق صغيرة طحين

1/2 ملعقة صغيرة بكينج باودر

3 ملاعق صغيرة سميد منقوع بأربع ملاعق كبيرة موية حارة لخمس دقايق

حليب سايل ( الكمية حسب مايحتاجة الخليط)

للشيرة (( القطر))..

2 كأس سكر

2 كأس موية

1 ملعقة كبيرة ماء زهر

1 ملعقة كبيرة ماء ورد

شوي زعفران

نص ليمونة

(( وممكن اضافة حبات من الهيل ))

***

الطريقة..

نفرك الزبدة مع الحليب

بعدها نضيف الطحين والبكينج باودر ونخلطهم

نضيف السميد ولو كان فيه موية زايدة نتخلص منها

راح نوزع السميد على الحليب ونفرك حتى يمتزج الخليط

نضيف الحليب السايل بالتدريج ونوزعه

نبدأ بربع كاس نصب شوي ونعجن ..

طيب كيف نعرف ان الخليط مايحتاج زيادة حليب سايل

راح يكون عندنا الخليط متماسك لكن لما نفتته يتفتت بسهولة

تقدرون تزودون حليب قد ماتبون لو شفتوا ان العجينة تتفتت مره او ناشفة بزيادة

بس المهم لازززززم ماتزودون حليب كثير

حتى ماتصير عجينة متماسكة

لانه مثل ماقلت لازم تكون متماسكة وبنفس الوقت تتفتت هذا الصح

نغلفها ببلاستيك تغليف ونخليها ترتاح خمس دقايق

***

وبهالأثناء نجهز الشيرة..

نكون ناقعين الزعفران بالموية

على النار نحط السكر والماء والزعفران ونعصر عليهم ليمون

نخليهم على النار حتى يغلي ويذوب السكر تماماً

بعدها نطفي النار ونضيف ماء الزهر والورد

(((طبعاً ملاحظة بسيطة بالشيرة في حال استخدمنا الكويا Khoa

نسوي الشيرة اثقل ..)))

***

طريقة التشكيل :

نشكل العجينة كور صغيرة (( متساوية ))

طبعاً نخليها صغيرة لانها راح تنفش لما نقليها

طريقة التشكيل ناخذ مقدار من العجين ونضغط عليه براحة اليد

ونكورها حتى تكون كورة ناعم سطحها ومتساوية..

نسخن الزيت وهنا نقطه ثانية مهمه ..

حتى ماينضج من برا ومن جو يكون لسى نيء..

طيب كيف نعرف ان الزيت جهز ..؟؟

شي مهم لازم تعرفونة ان القلاب جامون ينقلى بدرجات حرارة منخفضة

راح نسوي اختبار بسيط للزيت

اول مانلاحظ ان الزيت بدأ يسخن نختبر حرارتة بقطعه صغيرة من العجين

 المفروض هنا ان العجينة تقعد ثواني بالاسفل وماترتفع علطول

بعدها ترتفع وتطفو على سطح الزيت وبنشوف فقاعات

هنا درجة الزيت المناسبة

لو طولت العجينة بالأسفل خلوا الزيت يسخن شوي

ولو ارتفعت علطول معناتها ان الزيت سخن مره

وهنا ممكن نضيف نص كأس من الزيت على الزيت المسخن حتى يبردة شوي

ونتأكد انه صارت درجة حرارته مناسبه ..

نوطي النار علية .. ونقلي  ..

طيب كيف نقليه..؟

القلاب جامون وقت القلي المفروض ابد مانقلبه بالملعقة

وبنفس الوقت لازم تطلع درجة تحميرة وحدة مو جهه محمرة وجهه لونها فاتح

والحل انه اول ماتكون درجة الزيت مناسبة

راح نجيب ملعقة خشب ونحرك الزيت حركة دائرية ( كأننا نخلطة)

ونحط فيه كور القلاب جامون ونستمر بخلط الزيت ( تحريكة حركة دائرية)

بدون ماتجي الملعقة الخشب على الكور نفسها..

طيب وش اللي يصير لو قلبناها او حركنا الكور نفسها؟

راح تتفتت وتوسخ الزيت وتوسخ باقي الكور

نخليها حتى تحمر وطبعاً راح تطول شوي بالزيت

بعدها نشيلها ومباشرة نحطها بالشيرة ..

الشيرة لازم تطلع حارة ولو كانت بردت نرجع نسخنها حتى تبدأ تغلي

نحط القلاب جامون بصحن التقديم مع الشيرة

انا فضلت احطة بصحون صغيرة اجمل وارتب..

القلاب جامون يقدم حار أو بارد

والأفضل واطعم انه يقدم حار..

***