حلوى الجزر ( كاجر كا حلوه)

***

***

أهلين ..

نبذة عن حلوى الجزر ..

يسمى ب( حلوه الجزر) أو( كاجر كا حلوه ) أو ( كجريلا ) أو ( كاجر كا جريلا )

وهو من حلويات جنوب اسيا ( الهند – بنجاب – باكستان ….)

مكوناته بسيطة .. بس الطعم جداً لذيذ

يحتوي على الجزر الحليب السكر والسمن والمكسرات وممكن اضافة الزبيب

هالنوع من الحلويات يجي شوي دسم..

وميزة اننا نسوية بالبيت انه نقدر نقلل كمية الدهن والطعم نفسه مايتغير..

***

المقادير..

2 كأس جزر مبشور ( لازم يكون مبشور كبير )

1 كاس حليب طازج كامل الدسم

1 ملعقة صغيرة سمن

1/2 كاس سكر ( أو 3/4 كاس حسب الرغبة)

رشة هيل

مكسرات ( حسب الرغبة – استخدمت لوز وفستق وكاجو )

زبيب ( أختياري )

***

الطريقة ..

نحمص الكاجو واللوز بملعقة زيت ونخليهم على جنب..

نحط السمن في قدر على النار حتى يذوب ونضيف الجزر

ونقلب شوي حتى يبدأ الجزر يذبل ..

بعدها نضيف الحليب.. ونحركة زين ونخليه على نار هادية لمتوسطة

حتى يبقى بس ربع الحليب .. هنا نضيف السكر والهيل ونحرك زين

ونخليه على النار حتى يشرب الجزر كل الحليب ..

نضيق المكسرات ونخلطها مع الجزر .. ونخلي شوي على الوجة..

وبالعافية..

***

ملاحظة..

1- الحليب نقدر نزيدة الى كاس زيادة لو احتجنا..

2- هنا انا مازودت الحليب لانه استخدمت جبنة هندية تسمى تشنا

( وتسمى بعد بانيير هي نفسها الريكوتا مع اختلاف المسمى حسب الدولة)

هي اختيارية لو حابين تضيفونها او لا ..

لو اضفتوها لاتزودون كمية الحليب ..اكتفوا بكاس واحد حليب مع الجبنة..

بالنسبة للجبنة اللي لاحظتة عطت الجزر قوام كريمي اكثر ..

بس ماغيرت بالطعم بشكل واضح لهالشي ماكتبتها من الوصفة

وخليتها اختيارية..

طيب كيف نسوي التشنا..

على النار نحط 4 كاسات حليب على النار ونرفع عليه النار

ونحركه من فتره للثانية حتى مايحترق بأسفل القدر

اول مايغلي الحليب نضيف ملعقتين كبار ليمون

نخليه على النار من دقيقتين لثلاث ونطفي النار ونخلي حتى يبدأ يبرد شوي..

راح تنفصل المكونات عن بعض

نحط شاش ونصفي فيه الجبن ( التشنا )..

راح ناخذ ملعقة ونص كبيرة من التشنا ونضيفها قبل نسكر النار بشوي

يعني قبل لايشرب الجزر كل الحليب..

3- هالوصفة ممكن تكون للدايت بإستخدام زيت كانولا بدال السمن

وحليب قليل الدسم بدال كامل الدسم ( ماانصح بمنزوع الدسم)

وسكر مناسب للحمية أو عسل .. مع المكسرات تكون نية ..

***