كوكيز بالزبدة البنية وملح الهملايا بحشوة النوتيلا

***

***

اهلين..

نبذه بسيطة عن الكوكيز والاشياء المستخدمة بهالوصفة..

الكوكيز..

وشلون جاء الكوكيز ..؟

كان واحد من الطباخين يسوي كيك وياخذ قطعة من الكيك ويحطها بالفرن

والهدف انه يختبر درجة حرارة الفرن قبل مايخبز فية الكيكة كاملة

واختبار درجة حرارة الفرن للكيك هذا يسمى ( koekje )

وهي كلمة هولندية معناها الكيكة الصغيرة ..

وهالقطعة هي اللي صارت كوكيز .. وأنتشر بعدين

يعني الكوكيز بالأصل هولندي ..

شاع الكوكيز بالولايات المتحدة في القرن 17 .. جاء في مستوطنة إنجليزية لأمريكا

وأسمها صار بدال ( Koekje )  تغير لـ  ( cookie ) أو ( cooky )

في القرن ال 19 اشتهر الكوكيزفي  بريطانيا  ونال اعجابهم

وسمووة البسكويت أو الكعك الحلو .. زي في اسكتلندا مثلا..

***

الزبدة البنية

ومشهورة بأسمها الفرنسي (  Beurre noisette ) وتعني بالعربي زبدة البندق..

وهي زبدة عادية .. نحطها على النار حتى تذوب

وبعد فتره ينفصل زبدة الحليب عن جوامد الحليب

راح تنزل جوامد الحليب للأسفل ويقلب لونها بني

هنا الزبدة راح يكون لها ريحة مميزة وحلوة ..

طبعاً لازم وحنا نسويها نحرك وننتبه انها مجرد مايكون لونها بني

نشيلها من على النار..

وأفضل شي أننا نستخدم فلتر القهوة الورق لتصفيتها..

هالزبدة معروفة بالمطبخ الفرنسي

وكثير تدخل بالمخبوزات الفرنسية

وممكن تستخدم لحالها كصوص مع بعض الأكلات

هنـا انا استخدمتها زي الصوص ..

***

ملح الهملايا  الوردي..

هو نوع من أنواع الملح .. يجي لونة وردي بدرجات مختلفة

بعض بلوراته تميل للأحمر وبعضها ابيض زي لون الملح العادي

ألوانه المختلفه بين الأحمر والوردي والأبيض

مؤشر على انه غني بالمعادن المختلفه والحديد اللي يمدنا بالطاقه..

الملح هذا يسمى بالذهب الأبيض ..

تشكل هذا الملح  من قبل 250 مليون سنة..

من وين هالملح..؟

من منطقة الهيمالايا في سلسلة جبال كاراكورام

تقع هالجبال 400 كيلومتر من وادي هونزا في باكستان..

لملح الهملايا فوائد كثيرة ..

ومنها انه يحتوي على 84 نوع من المعادن والمعادن الخفيفة..

الملح هذا غني باليود مما يعني انه مايحتاج انه يضافله ..

يستخدم مو بس بالأكل..

لكن منه صحون وأبجورات وأشياء ثانية..

 لو حبيتوا تعرفون أكثر عنه وعن إستخداماته و فوائدة.. أكتبوا بقوقل ملح الهملايا ..

أستخدمته بهالوصفه تحديداً لأني لاحظت انه أخف من باقي أنواع الملح

طبعاً لو مالقيتوه تقدرون تستبدلونة بملح البحر العادي..

الملح هنا رشيته على الكوكيز وهو توة طالع من الفرن

تقدرون تستغنون عن هالخطوة بس الملح  معطي طعم جداً لذيذ

***

ملاحظة بسيطة..

الشكولاته اللي استخدمتها مو التشوكلت تشيبس العادية

أستخدمت شوكلاته ليندت وكسرتها قطع صغيرة بحجم التشوكلت تشيبس

برأيي انها ألذ.. ولكم حرية الإختيار..

***

***

المقادير..

2 1/4 كأس طحين

1 1/4 ملعقة صغيرة بكينج صودا

1/4 ملعقة صغيرة ملح ( استخدمت ملح الهملايا )

2 أصبع زبدة غير مملحة

1 كاس سكر بني

1/4 ربع كأس سكر

1 بيضة كبيرة + صفار بيضة

1 1/2 ملعقة صغيرة فانيلا سايلة

1 ملعقة كبيرة زبادي

3/4 كاس حبات شكولاة غامقة ( dark chocolate chips)

3/4 كاس حبات شوكولاتة بالحليب ( milk chocolate chips )

ملح هملايا

نوتيلا او زبدة الفول السوداني للحشوة

***

الطريقة..

نخلط الطحين والبيكنج صودا والملح

نحط الزبدة على النار على حرارة متوسطة ونستمر بالتحريك حتى تذوب

وراح بعدها تطلع فقاعات أو رغوة بعدها بتختفي

نخلي الزبدة على النار حتى يكون لونها بني فاتح وريحتها زي المكسرات

نشيلها من على النار وبعدها نصفيها بالفلتر الورق حق القهوة ..

وطبعاً مو ضروري بس افضل طريقة لتصفية الزبدة البنية استخدام فلتر القهوة الورق

متوفر بكل سوبرماركت تلاقونة عند قسم القهوة ..

بعد مانصفي الزبدة نخليها تبرد شوي

بخلاطة الكيك نخلط الزبدة والسكر ولما يختلطون نضيف البيض

والفانيلا والزبادي حتى يختلطون

نضيف الطحين بالتدريج والخلاطة على اقل سرعه

او ممكن نخلط بسبتيولا او اي شي ثاني

لما يمتزجون نضيف حبيبات الشوكولاتة ونخلطهم بسبتيولا او ملعقة

نلف العجين ببلاستيك تغليف ونحطة بالثلاجة ساعتين يبرد

بعد الساعتين نسخن الفرن على درجة 360 / 180

ناخذ مقدار متساوي من الخليط

( أنا استخدم ملاعق القياس الحجم الكبير كل حبة كوكيز تساوي ملعقتين )

نجي للحشوة وهي الأهم .. كيف نحط مقدار كبير من الحشوة وبسهولة

هي شيئين سويتهم وقدرت احشي بسهولة بدون مايذوب النوتيلا ويطلع من العجين

الشيء الأول أن النوتيلا لازم يكوون بارررد خليته بالثلاجة من اول ماجبته

وكل ماتحسون انها بدأ يذوب وانتم تشكلون رجعوة الثلاجة

الشي الثاني اللي يسهل عملية الحشوة هو كيف تحشون

لاتفردون الكوكيز وتحشونة لا.. أسهل نكورة وبأصبعنا نسوي تجوف بالنص

ونحط فية الحشوة ونسكره.. ونرجع نكورة شي بسيط

نصفة بصينية فيها ورق بارشمينت ونخلي مسافة كافية بين كل حبة والثانية

وندخلة الفرن من تحت بس .. لمدة عشر دقايق

بعد مانطلعه من الفرن مباشرة نرش كل حبة كوكيز رشة مره صغيرة من ملح الهملايا

بعدها نخلية على شبك التبرد..

وتمتعوا بألذ وأطعم كوكيز محشي بالنوتيلا.. : )

***