كلاسيك شورت بريد

الشورت بريد هو كوكيز غني بالزبدة..

الأصل فيه من سكوتلاند.. ويصنع من دقيق الشوفان

لكن مع الوقت صار يصنع من الطحين الابيض

في بعض الجزر السكوتلاندية يضفون له الكمون

شكله الأصلي يكون مثلث بأطراف دائرية ..

في هالوقت صار فيه مكونات كثيرة تدخل معاه

مثل السميد ودقيق الأرز .. ونقدر نسوية بأكثر من نكهه

صار فيه بالفستق وبالبرتقال والليمون والشكولاته والكراميل وغيرهم كثير..

نفس الشي بالنسبة للشكل .. مو لازم نتقيد بالشكل

ممكن نقطعه مستطيلات دوائر صغيرة أو أي شكل

سبب تسميتة بالشورت بريد Shortbread

لأن قوامة متفتت .. وهو المعنى القديم لكلمة شورت short

في هالبسكويت نلاحظ ان كمية الدهن كبيرة ومافيها ماء ابد

يعني أن الزبدة تقوم على نقصر عروق الجلوتين وبالنهاية يكون عندنا بسكويت متفتت

لو تبون تعرفون أكثر عن الجلوتين في المخبوزات راجعوا هالموضوع

بيتزا بدقيق الراي

في العالم العربي  ( الغريبة ) قريبة جداً للشورت بريد ..

لكن بكمية دهون أقل.. و بشكل دائري .. ونزينها بالصنوبر عادة

سويته هنا بالطريقة الكلاسيكية وبدون أي إضافات ..

***

المقادير..

250 جم زبدة بدرجة حرارة الغرفة

125 جم سكر ناعم + زيادة للتغطية

250 جم طحين

125 جم دقيق رز

رشة ملح

الطريقة..

نخلط الزبدة والسكر مع بعض حتى يكون عندنا خليط كريمي

نخلط الطحين ودقيق الرز  مع الملح وننخلها ونضيفها على خليط الزبدة

ونخلط المكونات واهم شي مانخلطها كثير  مجرد ماتمتزج نوقف الخلط..

ننقل العجينة لسطح المطبخ .. نقوم بعجنها شي بسيط

بعدين نغلفها ببلاستيك وندخلها الثلاجة نص ساعه ..

نقسم العجينة لقسمين .. نرش سطح المطبخ بشوي طحين

ونفرد العجينة لدائرة قطرها 20 سم ..

ننقل العجينة لصينية الفرن .. بعد مانحط عليها ورق الزبدة

وبالسكين نحدد العجينة ل 8 اجزاء بدون مانقطعها..

يعني راح تكون عندنا 8 مثلثات و بالشوكة نسوي ثقوب بكل مثلث

بالشكل هذا

نسوي الاطراف بأصابعنا .. حتى تتساوى ويكون شكلها مرتبه

نرشها بالسكر الحبات .. وندخلها الفرن على درجة 190 ( 375 )

لمدة مابين 18-20 دقيقة .. حتى يكون لونة ذهبي

بعد مانطلعه من الفرن نقطع الاجزاء اللي حددناها من قبل

نحاول ننتبه عند تقطيعها حتى مايتفتت ويتكسر البسكويت ونستخدم سكين حادة

ومانشيلها من صينية الخبز الا لما تبرد حتى ماتتفتت

***