مصابيب

مصابيب

***

_MG_4852-2

***

بالنسبة للي مايعرف المصابيب ..

من الأكلات السعودية الشعبية المشهورة في منطقة نجد..

أقراص تشبة البانكيك ولكن بطحين بر وتكون خفيفه ورقيقه مره

ممكن نضيف لها مكونات ثانية مع الخليط مثل البصل الأخضر أو البصل العادي

طبعاً في حال اضفت للمصابيب بصل عادي افرمة صغير مره

واخلطة مع خليط المصابيب

واخليها فترة اطول على النار حتى ينضج البصل ومايكون طعمه مزعج..

طبعاً مو بس كذا المصابيب لذيذة لو اضفنا لها مكونات ثانية بعد مانسويها

مثل الكشنة ( حمسة بصل وطماطم)..

وممكن تكون حالية مع العسل ورشة قرفة..

او ممكن نحشيها بأي حشوة ونلفها تكون رولات محشية..

وغيرة كثير..

***

_MG_4842-2

***

المقادير..

 1/4 1 كاس طحين بر

بيضة

1 ملعقة صغيرة سكر

4 ملاعق كبيرة حليب بودر

1 ملعقة صغيرة بيكنج بودر

رشة ملح

1 ملعقة كبيرة زيت زيتون

ماء

***

_MG_4853-2

***

الطريقة..

نخلط جميع المقادير مع بعض ونزود الماء بالتدريج

المفروض يكون خليط خفيف وسائل

تقريباً حطيت كاسين ماء بس ممكن تحتاجون اقل او اكثر..

نسوية بمقلاية وبالحجم اللي نحب .. او بالآلة المخصصة للبان كيك

ناخذ مقدار مغرفة ونحطة بالمقلاية ونوزع الخليط فيها طبعاً لازم تكون المقلاية حارة..

ونخليه حتى يتحمر مع جهة ونقلبة ونحمرة مع الجهة الثانية..

هنا مااحتجت ادهنها بزيت بس لو احتجتوا حطوا مسحة خفيفة..

***

_MG_4841-2

***

قدمت معه هنا تغميسة لذيذة وسريعة..

لبنة + شوي ريحان مفروم + زيت زيتون بالليمون + رشة ملح

لو ماتوفر عندكم زيت زيت الليمون حطوا شوي بشر ليمون مع زيت زيتون

وبالعافية..

***

كيف نزيل ريحة الأكل من اليدين والفم

كيف نزيل ريحة الأكل من اليدين والفم

***

كيف نزيل ريحة البصل والثوم من اليدين.. 

طبعاً كثير عندة هالمشكله مايعرف كيف يوخر الريحة

وأنا أول كنت أول وحده أعاني من هالمشكله

وكنت أسوي أشياء كثيرة وتروح الريحة

بس بعد جهد ومحاولات كثيرة

لهالشي جمعت لكم أهم الطرق الي توخر الريحة

وترجمتها حتى الكل يستفيد

شي أخذتة من النت وشي من تجربتي

لكن بالبداية وقبل كل شي نتأكد من عدم وجود جروح

أو حساسية أو جفاف شديد باليد

طريقة إزالة الريحة

***

طريقة إزالة ريحة البصل والثوم من اليدين..

 

أولاً.. الملح والماء البارد

ناخذ شوي ملح مع ماء بارد

طبعاً الماء البارد مجرد نقط بسيطه نبي يكون عندنا

زي العجينة .. ونفرك فيها اليد زين

ونركز على ماحول الأظافر..

وميزة الملح مو بس يوخر الريحة ..

راح يزيل القشور ويسوي تقشير بسيط لليدين

إذا مانفع الملح .. نستبدله ببكربونات الصودا

أو القهوة .. أو السكر

والسكر له ميزة أنه مايضر لو فية جرح

بس من الأفضل زي ما قلت بالبداية أننا نعالج الجرح

أو نسكرة ببلاستر قبل نستخدم هالأشياء

ثانياً.. عصير الطماطم

نحط يديننا بعصير طماطم ونخليها لمدة خمس دقايق

بعدين نغسلها بالماء البارد والصابون

ثالثاً.. الاستانلس ستيل المقاوم للصدا

والمقصود فية الفولاذ المقاوم للصدأ

نشوف أيش اللي عندنا مصنوع من الفولاذ

أو نفرك يديننا بملعقة وتكون تحت الماء البارد

يعني كأننا نغسل والملعقة هي الصابونة

طبعاً الحين صار فية صابونة تقوم مقام الملعقة

تكون مصنوعة من الفولاذ مخصصة لهالشي

هنا صورها .. جبتها من دايسو ..

يمكن هالشي يثبت لنا فاعليتة في إزالة الروائح

والسبب في أن مادة الكبريت الموجودة بالبصل

تتفاعل مع المعدن .. وتبطل أو تضعف الريحة

رابعاً.. عصير الليمون .. أو الخل أو غسول الفم

نحط عصير نصف ليمونة في صحن ونحط يدينا فية

لمدة ثلاث دقايق.. وإذا ماعندنا ليمون

نحط خل أو غسول فم.. كلهم نفس المفعول تقريباً

طبعاً أنا أحط في نفس الليمون بعد مااعصرها

شوي سكر وشوي ملح .. السكر ينعم اليدين

والملح يقشر..

خامساً.. زبدة الفول السوداني.. أو المعجون

نفرك يدينا بزبدة الفول السوداني ..

طبعاً راح يكون فية دسم شوي بس المهم يوخر الريحة

 أو المعجون إذا ماكان عندنا زبدة الفول السوداني..

سادساً.. قشر البرتقال..

ندعك يدينا بقشر البرتقال لدقيقتين

سابعاً.. غسل اليدين بالصابون والماء البارد قبل التقطيع..

طبعاً أكيد راح نغسل بالصابون

بس الفكرة مع الماء البارد لأن الدافي يفتح المسام

إزالة ريحة الحمضيات..

أنا من الناس اللي يتضايق من وجود ريحة باليدين بشكل عام

ومالقيت حل ألا بعد غسل اليدين..

نستخدم أي نوع مقشر ومو بس بيخفف أو يشيل الريحة

بيعطي نعومة لليدين

بعدين نحط لوشن معطر..

***

كيف نزيل الريحة من الفم..

طبعاً كلنا عارفين الثلاث خطوات المهمة بإزالة الريحة

تفريش الأسنان واللثة واللسان.. الخيط .. وغسول الفم

نفس الشي بالنسبة لأكل حلاو نعناع أوفكس (المنثول)

* بعد كذا .. فية خلطة مرة حلوة أنا أستخدمها كثير

راح نحس بإنتعاش بعدها

اللي هي في فنجال ماء دافي نحط ملعقة صغيرة من كل من

هيل وقرفة ومسمار وملح

نخلطهم زين ونستخدمهم كمضمضة وغرغرة

مررره رووووعه

* وفية طريقة ثانية بس أحب أنبه أني مدري إذا تضر الأسنان أو لا

أحط عصير ليمون بفرشة الأسنان وأتفرش فيه

* بالنسبة إذا أكلنا ثوم ناكل بعده بقدونس ..

يمكن مايوخر الريحة بقد مايوخر الطعم..

* فية بعد من الأشياء الحلوة..

الوايت كوفي ( القهوة البيضاء )

والقهوة البيضاء للي مايعرفها

هي عبارة عن ماء زهر + ماء.. وممكن إضافة شوي سكر

وطريقتها ..

فنجال ماء مغلي وأقصد بفنجال القهوة التركي

مع ملعقة ماء زهر .. ونقلل أو نكثر الكمية على حسب الرغبة

يمكن ماتوخر الريحة بس تطهر الفم وتوخر الطعم

 ***

باوند كيك بالموز

باوند كيك بالموز

 

الباوند كيك هو كيك بريطاني يعود تاريخة لبداية القرن الثامن عشر..

وهو الكيك اللي يحتوي على رطل من كل من السكر والطحين والزبدة والبيض

عشان كذا سميت بالباوند كيك أو (كيكة الرطل)..

وكان الكيك كميتة مرة كبيرة ..طبعاً مع الوقت قللت الكمية وصارت أصغر

وتم التعديل بالوصفة حتى تطلع أخف وزن..

وتم إضافة مكونات كثيرة زيادة على الوصفة الأصلية للكيك

مثلاُ.. في الأول ماكانوا يستخدمون أي نوع من الخمائر

والحين صرنا نقرأ بالوصفات بيكينج بودر وبيكينج صودا

ومع ذلك أحتفظت بأسمها .. حتى مع التغيير فيها

هنا راح اعطيكم نبذة بسيطة عن الخمائر عموما

لان الوصفة اللي راح أكتب عنها تحتوي على نوعين من الخمائر..

أول شي لازم نعرف الفرق بينهم.. وإستخداماتهم..

***

المواد الرافعة (leaveners) أنواع..

المواد الرافعة تعمل على رفع المخبوزات نتيجة لوجود غازات في العجائن تزيد من حجمها

 وتعطي القوام و الملمس و هذه الغازات يجب أن نحتفظ بها في العجين حتى يتم التشكيل

 بواسطة تصلب الجلوتين و بياض البيض ليحافظ على الرفع

قبل لازم نعرف أنواع المواد الرافعة..

1_ طبيعية .. الهواء وبخار الماء

الهواء .. وذلك بعدة طرق نسويها حتى نخلي الهواء يدخل بالعجين..

نخل الدقيق مع المقادير الجافة.. فرك المادة الدهنية بالطحين

دعك المادة الدهنية مع السكر حتى يكون عندنا خليط ناعم..

خفق البيض زين.. فرد وطي العجينة كثير.. ضرب العجينة ..

في نقطة مهمة هنا في الكيك.. وهو أننا أول مانخلص من الخليط ندخلة الفرن

لأنه إذا كان برا الفرن مدة طويلة بعد لإنتهاء منه راح يطلع الهواء اللي فية

وهالشي لازم ننتبهلة خصوصاً مع الكيك الإسفنجي..

بالنسبة لبخار الماء راح يجي من المادة السائلة اللي تكون في العجين..

2 _ المواد الرفعة الحيوية..

مثل الخميرة.. هــنــا تكلمت عنها وعن إستخداماتها..

3- المواد الرافعة الكيميائية..

1 – بيكربونات الصودا..

إذا أضيف لها الماء والحمض ينبعث منها ثاني أكسيد الكربون وهي مادة رافعة للعجائن

له قواعد لإستخدامه أولها أننا مانخلي العجين برا بعد مانخلص منه لازم ندخلة الفرن علطول

وإلا تصاعدت الغازات قبل الخبز ويفقد العجين قوة الرفع..

عند استخدامة يحتاج توازن بينة وبين حمض مثل عصير الليمون أو اللبن أو البيكنج بودر ..

ولو ماصار هالتوزان راح يكون طعم مر ..

2- البكينج بودر..

وهو خليط من بيكربونات الصودا وأحد الأحماض ليتفاعل معها

وهو مناسب لانه مايحتاج أحماض حتى يتفاعل معها عشان كذا هو الأنسب للإستخدام

بس لو زودنا الكمية راح تطلع نكهه غير مقبولة..

إختبار صلاحيه البيكنج بودر :

نحط ملعقه شاى من البيكنج بودر فى كوب فيه ماء دافئ ونقلبها زين

 إذا طلع فوران كاف دل على وجود كميه جيده من الغاز

3- بيكربونات الأمونيا ( النشادر )..

وهى من المواد الرافعه الكيمائيه القليله الإستعمال

 وتنتج عند وضعها فى العجائن غاز ثانى أكسيد الكربون وغاز النشادر وبخار الماء

 وله ريحه نفاذه لهالشي يقتصر إستعمالها على البسكويت لأنها تتطاير بسرعه

ولو إستعملت فى الكيك الدسم تبقى ريحة داخله وتخلي لونة غامق ونكهتة غير مستحبه

* طبعاً في أنواع من الطحين فية مواد رافعه..

وتختلف نسبة المادة فية من نوع للثاني..

* وبعد بياض البيض يستخدم احياناً كمادة رافعه مثل بالكيك الإسفنجي..

***

المقادير..

2 3/4 كاس طحين لجميع الإستخدامات

2 ملعقة صغيرة بيكنج بودر

1/2 ملعقة صغيرة بيكنج صودا

1/2 ملعقة صغيرة ملح

1 ملعقة صغيرة قرفة

1/2 ملعقة صغيرة هيل

150 جم زبدة يعني أصبع ونصف

3/4 كاس سكر أبيض

3/4 كاس سكر بني

3 بيض كبير

2 ملعقة صغيرة فانيلا سايلة

3/4 كاس بترميلك (لبن) = 200 مل

1 1/2 كاس موز مهروس

1/2 ملعقة صغيرة روح الموز ( إختياري)

الطريقة..

نشغل الفرن على درجة 160

نجهز صينية ( Bundt pan  )* أو أي نوع ..

وندهنها بزيت أو نستخدم السبراي المانع للإلتصاق*

نخلط الطحين والبيكنج صودا والبيكنج بودر والملح والقرفة والهيل

ننخل المقادير الجافة مع بعض..

نخلط الزبدة والسكر الأبيض والبني حتى يكون عندنا خليط كريمي

نضيف البيض على خليط الزبدة .. وبعدين الفانيلا

في الفود بروسسير او بالشوكة نهرس الموز وانا افضل الفود بروسسر

حتى اتأكد ان الموز انهرس زين.. ولازم ننتبة لنقطة ان الموز مانهرسه

الا وقت مانجي نضيفة على الخليط حتى مايسود..

وبعدين نحطة بوعاء ونضيفلة اللبن..

ناخذ ثلث كاس من الطحين ونخلطه مع خليط الزبدة

وبعدين ثلث كاس من خليط الموز نضيفة على خليط الزبدة

وكذا بالتناوب شوي خليط الطحين وشوي الموز حتى يختطلون زين

نحط الخليط بالصينية وندخلة الفرن لمدة تتراوح مابين 45 دقيقة إلى ساعه

ملاحظات..

1- Bundt pan  المقصود فيها اي صينية حلقة.. وتجي أشكال كثيرة

هنا استخدمت Chrysanthemum bundt

2 – السبراي المانع للإلتصاق non-stick spray

 انسب للصواني اللي زي كذا خصوصاً لما تكون فيها زوايا كثيرة تضمنين

أن الكيك ماراح يلتصق .. وعموماً أنا افضلة لدهن الصواني بدل الزيت ..

3- في نقاط كثيرة لنجاح للكيك اكيد الأغلب عارفينها بس راح اذكرها للتنبية للي مايعرف

أول شي بالنسبة للمكونات كلها أفضل تكون بدرجة حرارة الغرفة

البيض والزبدة والبترميلك..

الكيك لما نطلعه من الفرن مانطلعة من القالب علطول وألا تقطع معنا

مانعرض الكيك لهواء بارد حتى يبرد .. وألا نشف

نحط الكيك على الرف الوسط بالفرن..

4- لتقطيع الكيك نسخن السكين شي بسيط.. أو نحطها بموية حارة ونمسح الموية..

5- لو كنا نستخدم مكونات تلصق بالكاس زي العسل أو زبدة الفول السوداني

ممكن نرش كاس القياس برشة بسيطة من السبراي المانع للإلتصاق

وهذا الشي يساعد الخليط انه يطلع بسرعة من الكاس..

5- حتى يصير الكيك أخف .. لما نجي نحط البيض نفصل الصفار عن البياض

نخلط الصفار مع الزبدة والبياض لحاله وبعدين نضيف البياض على الزبدة

6- إذا كانت الزبدة جامدة وماخليناها وقت كافي برا..

نحطها فوق وعاء فيه ماء دافي لمدة 10 دقايق مو بوسط الماء لا .. فوقة..

***

بروسكيتا الطماطم والريحان

بروسكيتا الطماطم والريحان

***

bruschetta with tomato and basil

***

البروسكيتا من المقبلات الإيطالية…

الأساس فيها الخبز المحمص الثوم الفلفل والملح وزيت الزيتون..

الإضافات الثانية تختلف ممكن لحوم أو فلفل حار أو بقول أو جبن..

والوصفة المنتشرة أكثر .. أو الأكثر شعبية..

مكوناتها الطماطم والثوم أو البصل الريحان والموزريلا..

في ايطاليا نفسها يختلف مسماها وطرق تقديمها من مدينة للثانية

ممكن تقدم مع السلامي واللحوم..

أو بس مع الزيت زيتون مثل في توسكان الايطالية..

وهذا حتى يتذوقون الزيت الأول للموسم..

***

المقادير..

8 شرايح خبز باجيت أوخبز التشاباتا

1 طماط حبة كبيره

ملعقتين كبار زيت زيتون

فصين ثوم صغار مهروسين

رشة ملح وفلفل

3 أوراق ريحان

نصف ملعقة صغيره خل بلسميك

موزاريلا (اختياري)

bruschetta with tomato and basil 2

الطريقة:

* نسلق الطماط لمدة دقيقه حتى نقدر نفصل القشر

نزيل القشر ونقطعه قطع صغيره بعد مانشيل اللب

* نفرم الريحان ونضيفه للطماط مع الفلفل والملح وخل البلسميك

* نخلط الثوم المهروس مع زيت الزيتون نحط مقدار نصف ملعقة كبيرة مع الخليط

* نقطع الخبز شرايح وندهنه باللي بقى من زيت الزيتون والثوم

و نمسحه بمسحه خفيفه حتى مع الجهه الثانيه ندخله الفرن 3 دقايق تقريبا

* نطلعه ونضيف الموزريلا وندخله الفرن حتى يذوب الموزريلا شوي

* نضيف عليه الطماط وندخله الفرن شوي يعني دقيقتين تقريباَ

* نزينه بأوراق الريحان

***

كبة الجبن

كبة الجبن

***

kebba 01-1

***

قد قريت مرة عن كبة الجبن..

ولأني ضيعت الطريقة.. سويت المقادير من عندي

وطلعت ناجحة.. وطعمها مميز..

المقادير..

كأس برغل

1/2 كاس طحين

نعناع

بصلة متوسطة الحجم

رشة فلفل + ملح + بابريكا

1 ملعقة كبيرة زيت زيتون

للحشوة ..

جبن أبيض ربع كيلو

نصف كاس بقدونس مفروم

1 ملعقة كبيرة  زيت زيتون

***

kebba 02-1

الطريقة..

ننقع البرغل بماء مغلي حتى يصير لين

في الفود بروسيسر نخلط البرغل البصل النعناع والبهارات وزيت الزيتون

طبعاً النعناع كميتة غير محددة حسب الرغبة

بس أنا أحب أكثرة بما يعادل ربع كاس نعناع مفروم

أنا أخلط كل شي إلا الطحين منها عشان أتأكد من الملح

ونكهة النعناع لأني أبيها قوية

بعدها أحطهم بوعاء وأضيف لهم الطحين بالتدريج وأعجن بيدي

وفائدة الطحين أنه يخلي الخليط متماسك

يعني لو حسينا الخليط مو متماسك نقدر نزود طحين

نحشية بالجبن ..

ونقدر بعد نحشيها بالدجاج واللحم..

بس أنا فضلت الجبن

نقليها بالزيت..

***

كيكة التمر بالعسل وعين الجمل

كيكة التمر بالعسل وعين الجمل

الكيكة سهلة وسريعة

وطعمها مميز بالعسل والشوفان ..

المقادير..

4/3 كاس تمر ( حبات ) نقطعة قطع صغيرة

1 كاس طحين كيك

4/1 كاس شوفان

4/3 كاس زيت نباتي

2/1 كاس سكر بني

4/1 كاس عسل

2 بيض

2/1 كاس عين الجمل ( الجوز) قطع صغيره

ملعقة صغيرة باكينج بودر

ملعقة صغيرة كاكاو

ملعقة صغيرة فانيليا

4/3 ملعقة صغيرة قرفة

2/1 ملعقة صغيرة ملح

رشة جوزة الطيب

الطريقة: 

نخلط الطحين والباكنج بودر الملح القرفة والكاكاو

ننخلهم مرتين

بخلاط الكيك نخلط الزيت والسكر العسل والبيض والفانيليا وجوزة الطيب

نضيف خليط الطحين تدريجياً وبعدة الشوفان

واخر شي نضيف التمر وعين الجمل ونخلطهم بالسبتيولا أو بالملعقة

نحط شوي من صوص التوفي على الوجة ونزينهم بعين الجمل

 

صوص الدولسي دي لتشي Dulce de leche

صوص الدولسي دي لتشي

Dulce de leche

dulce de leche01

***

هو صوص كراميل .. مكوناته سكر والحليب.. له مسميات ثانيه بحسب أختلاف البلد

يسمى (Cajeta ) (Manjar blanco ( Manjar) ( doce de leite )

مسميات كثيرة من أسبانيا وأمريكا اللاتينية

ويوصف بحلوى الحليب .. أو مربى الحليب

والمشهور بالصوص أنه يستخدم مع بسكويت الفاخر (alfajores الفاخيروس )

ويدخل بصنع حلويات كثيرة..

الايسكريم والتشيز كيك والمافن.. وكثير

فيه طرق كثيره نقدر نسوي منها هذا الصوص ..

 

وراح أتكلم عن كل طريقه..

 

الطريقة الأولى..

طريقة تسخين الحليب المكثف المحلى ..

لها طريقتين..

الطريقة الأولى والأسهل..

نفرغ الحليب في قدر على نار هادية جداً

في البداية راح نحتاج نحرك كل 3-4 دقايق

بعدها راح نلاحظ ان الحليب بدأ يتغير لونة ويثقل شوي

طبعاً هنا نستمر بالتحريك حتى يثقل الصوص

طبعاً لازم نراعي انه راح يثقل اكثر بعد مايبرد..

الطريقة الثانية..

 نسخن الحليب بالعلبة وأنا ماأفضل هالشي أبد لسببين

أولاً أنها أحتمال العلبة تنفجر .. لهالشي قالو نحط فتحات صغيرة في العلبة..

السبب الثاني أنها تاخذ وقت طويل على النار تقريباً من 4 إلى 5 ساعات ..

 

الطريقة الثانية..

جربت الطريقة حلوة ومن مميزاتها أنه راح ينجح معاك الصوص

بدون مايتكتل ولايحتاج لها أنتباه

راح تاخذ من 2 الى 3 ساعات

ولازم نسويها زي ماهي والا ماراح يكون عندنا الصوص ثقيل

 وطبعاً بعد مايبرد راح يثقل ..

 

المقادير..

لتر حليب طازج

كاس ونصف سكر

ملعقة صغيرة فانيليا

2/1 ملعقة صغيرة بكينج صودا

 

الطريقة..

نحط الحليب.. الفانيليا والسكر في قدر ونحرك إلين يذوب السكر..

وبعدها نضيف البيكنج صودا ونحرك شوي..

نخلي الحليب يغلي ونحريك من وقت للثاني ..

نخلي الحليب يطبخ لمدة ساعة ونصف الى ساعتين ..

راح تقل كمية الحليب وراح يصير لونة زي الكراميل..

نحطه بعلبة ونخليه بالثلاجة ووقتها راح يغلظ شوي ..

 

 

الطريقة الثالثة..

الطريقة سريعه وسهله تاخذ منا تقريبا 40 دقيقة وهي الأفضل عندي بين كل الطرق الثلاث..

 

المقادير..

لتر حليب طازج كامل الدسم

كاس وملعقتين سكر ( 230 جم)

ربع كاس سكر بني ( 50 جم )

ربع ملعقة صغيرة بكينج صودا

ملعقة صغيرة فانيليا

ملعقة صغيرة جلوكوز ( 30 جم )

الطريقة.. 

على نار هادية نحط كاس من الحليب و السكر الأبيض الفانيليا والبكينج صودا

نحركهم بملعقة خشب حتى يصير لونهم زي الكراميل..

بعدها نضيف كاس ثاني من الحليب والسكر البني ونحركهم بسرعه

ونخليهم على النار مع التحريك من فترة للثاني حتى يصير عندنا خليط ثقيل شوي

نضيف الكاس الثالث وننتبه لهالخطوه اننا نحرك بسرعه حتى مايتكتل عندنا الخليط

ولما يثقل وتقل كمية الخليط

نضيف اخر كاس مع الجلوكوز ونطفي النار مع استمرارنا بالتحريك

راح تقل كمية الحليب وحتى نصير نشوف قاعدة القدر لما نحرك بالملعقة..

نشيله من على الفرن ونحركه شوي ونحطه بعلبه بعد مايبرد شوي ونخليه بالثلاجة..

وراح يغلظ أكثر لما يبرد..

***

السلطة اليونانية

السلطة اليونانية

***

IMG_4483-1

*** 

المقادير..

– زيتون أسود أي نوع تفضلونه

– طماطم كرزية

– 3 حبات خيار مقطع حلقات

–  1 بصل أحمر متوسطه الحجم مقطع حلقات

( البصل ينقع بموية وملعقة كبيرة خل لمدة ربع ساعه حتى يخف طعمة)

– 2 ملعقة كبيرة بقدونس مفروم

– 100 جم جبن فيتا مقطع مكعبات

( فيتا الماعز ألذ مع هالسلطة ولكم الخيار)

– جرجير أو خس ( إختياري ) 

للتتبيل:

4 ملاعق كبيرة زيت يتون

1 ملعقة كبيرة خل بلسميك ( أو خل أبيض)

1 ملعقة كبيرة عصير ليمون

2 ملعقة صغيرة أوريغانو

رشة ملح وفلفل

1/2 ملعقة صغيرة سكر ( إختياري )

***

*الصوص نحطة قبل التقديم مباشرة حتى ماتذبل السلطة..