السلام عليكم ورحمة الله ..

أهلاً بتدوينه جديدة..

يقولون أن الماربل كيك حقت شيف سيرل لينياك أفضل ماربل كيك ف باريس..

من قريت هالجملة وأنا متحمسة مره لتجربتها ..😍

وفعلاً جربت الوصفة وكانت لذيذة.. لكن شخصياً ماكانت ذوقي لهالشي عدلت عليها حسب اللي يناسبني..وسهلت الطريقة..

سويتها مرتين وبكتبلكم الطريقتين ..

طيب بتقولون وش الفرق..؟

الأولى جربتها بطريقة الشيف بالضبط..

( ونقلتها لكم وترجمتها حرفياً بدون تعديل )..

الوصفة الثانيه بعدل التعديل حسب ذوقي..

وبصراحة كلنا فضلنا وصفتي و بكتب لكم الثنتين ولكم الخيار..

……

*رجاء أقروا الموضوع للأخير وبكل خطوة ..

لأن نص اللي يسألوني دايم يا ماقروا وش كتبت كله أو يبدلون الطريقة من عندهم ..

…..

طريقة الشيف سيرل لينياك..

المقادير:

للكيك الخليط السادة :

٣٠ جم زبدة

١٠٠ جم صفار بيض ( حوالي صفار ٥ بيضات)

١٣٠ جم سكر ناعم ( مو باودر )

٧٠ جم كريم

١٠٠ جم طحين

٢ جم بيكنج باودر

لكيك الشوكولاتة:

٣٠ جم زبدة

٨٠ جم صفار بيض ( حوالي صفار ٤ بيضات)

١١٠ سكر ناعم ( مو باودر)

٢٠ جم كاكاو باودر

٩٠ جم طحين

٦٠ جم كريم

٢ جم بيكنج باودر

لطبقة الشوكولاتة مع اللوز:

٥٠ جم لوز مكسر صغير

٢٢٥ جم شوكولاتة حليب

٥٠ جم زيت دوار الشمس

الطريقة:

للكيك السادة:

نذوب الزبدة ونخليها تبرد شوي..

نخلط البيض والسكر نضيف لهم الكريم

ننخل الطحين والبيكنج باودر ونخلطهم مع باقي المكونات.. واخر شي نضيف الزبدة المذابه ونخلط..

لكيك الشوكولاتة:

نذوب الزبدة ونخليها تبرد شوي..

نخلط البيض والسكر نضيف لهم الكريم

ننخل الطحين والبيكنج باودر والكاكاو الباودر ونخلطهم مع باقي المكونات.. واخر شي نضيف الزبدة المذابه ونخلط..

نحطهم بقالب كيك ونسوي خطوط وندخلهم الفرن على درجة ١٨٠ c لمدة ٥٠ دقيقة او حتى ينضج..

للشوكولاته مع اللوز :

نسخن الفرن لدرجة ٢١٠ c ونحط اللوز بصينية ونحمصة بالفرن لمدة ٥ دقايق او حتى يتحمص زين.. بحمام مائي نذوب الشوكولاتة لدرجة45 c وبعدها نضيف الزيت واللوز ونخليها حتى تصير بدرجة حرارة الغرفه ونضيفها على الكيك..

الوصفة من هالموقع..

https://www.femina.fr/recette/cake-marbre-chocolat-vanille-de-cyril-lignac

……

وصفتي بعد التعديل والإضافة..

المقادير :

٦٥ جم زيت

١٨٠ جم بيض ( حوالي ٤ بيضات بدرجة حرارة الغرفة)

٢٣٠ جم سكر ناعم ( مو باودر )

١٣٠ جم قشطة

١٩٠ جم طحين

٤ جم بيكنج باودر

٢ جم ملح

ڤانيلا

١٦ جم كاكاو باودر ( استخدمت فالرونا )

للتغطية:

٥٠ جم لوز مكسر صغير

٢٠ جم زيت دوار شمس

٢٠٠ جم شوكولاتة بالحليب

( انا استخدمت ١٥٠ جم  lindt شوكولاتة بالحليب + ٥٠ جم فالرونا دارك تشوكلت ٦٠٪؜ )

الطريقة:

نخلط السكر والبيض حتى يكون أصفر فاتح

نضيف الزيت والقشطة والڤانيلا ونخلط

ننخل الطحين والملح والبيكنج باودر ونضيفهم على باقي الخليط

ناخذ مقدار ٣٠٠ جم من الخليط ونضيفله الكاكاو الباودر

( ملاحظة: خليط الكاكاو بيكون اثقل من الساده )

في قالب كيك استخدمت

( bp 7.75 x 3.75 x 2.75 inch)

نرش القالب ب بخاخ مانع للإلتصاق

ونحط كل خليط ( السادة والشوكولاتة ) بكيس حلويات ( بيستري باق) ونبدأ نحط الكيك بالقالب والطريقة اننا نحط خطوط عشوائية بالكيك السادة وعليها خطوط كيك الشوكولاتة وبعدها ساده وكذا حتى يخلص الخليط..

ندخله الفرن على درجة 180 c لمدة ٥٠ دقيقة أو حتى ينضج..

إذا جهز نحطه على شبك تبريد ..

بعد ساعه نجهز التغطية..

نحمص اللوز ( بالفرن او بمقلاية على النار حتى يكون لونة ذهبي ونخلية على جنب يبرد)

نكسر الشوكولاتة كسر صغيرة ونذوبها بحمام مائي حتى توصل درجة حرارتها ل ٤٥ c

نشيلها علطول ونخلط معها مباشرة الزيت واللوز وننقلها بكوب  قياس كبير حتى يكون سهل صبة على الكيك.. ونخلية على جنب حتى يصير بدرجة حرارة الغرفة..

نجهز صينية ونغلفها ببلاستيك تغليف وفوقها شبك ونحط فوقه الكيك ( وممكن لو حبيتوا تقطعون أطراف الكيك مو مشكله لكن انا خليتها)

نخلط بخفة خليط التغطية ( الشوكولاتة واللوز ) ونصبة على الكيك من جميع الجهات .. بعدها ناخذ الزايد اللي نزل بالصينية ونرجعه بالكوب ونصبه على الكيك مره ثانيه..

نتأكد انه تغلف الكيك من جميع الجهات وممكن نكرر الحركة اكثر من مره ..

نخلي الكيك بالثلاجة ساعه حتى تتماسك شوكولاتة التغطية.. او تخلونة كم ساعه برا راح يتماسك..

( ملاحظة ممكن الزايد من خليط التغطية تحطونه بكوب وتضيفيونه على الكيك بعد التقطيع لذييييذ)

وبالعافيه..

{“origin”:”unknown”,”uid”:”763BCFAA-A280-4491-8062-E8549863C220_1585585311861″,”source”:”other”}