دونات خفيفة وطرية

…

…

أهلاً وسهلاً..

رجعت بوصفة جديدة والأكيد لذيذة..

هالدونات لو سويتوها بالضبط مثل ماهو مكتوب بالوصفة راح تكون النتيجة ألذ وأخف دونات ممكن تسوونها..

…

المقادير (١) :

٢٥٠ جم طحين ( يفضل طحين خبز )

٣٠ جم سكر ناعم

٥ جم ملح

٦ جم خميرة

٢ بيض بدرجة حرارة الغرفه

٧٥ جم/ مل حليب

٦٠ جم زبدة غير مملحة بدرجة حرارة الغرفه

قشر نص ليمونه ( بس القشر مبشور ناعم )

١ ملعقة صغيرة فانيلا

المقادير (٢):

زيت للقلي

سكر ناعم للتغطية

للحشوة:

فانيلا بيستري كريم

***

الطريقة:

…

بوعاء العجانه نحط جميع المقادير ماعدا الزبدة..

نعجن حتى تتماسك العجينة ( حوالي ٨ دقايق)

نترك العجينة ترتاح دقيقتين ..

نرجع نعجن على سرعه متوسطه وتدريجياً نضيف الزبدة

نضيف قطعه قطعه حتى ننتهي من إضافتها كلها..

اذا اضفنا الزبدة كلها وتداخلت كلها مع العجين نزود سرعة العجن

من سرعه متوسطة إلى عاليه ونعجن لمدة خمس دقايق ..

حتى تصير عندنا عجينة ملساء وناعمه ومتماسكة..

نغطيها ببلاستيك تغليف ونتركها تخمر حتى يتضاعف حجمها..

بعد ماتخمر نطلع الهوا منها ونرجع نغطيها زين ببلاستيك..

وندخلها الثلاجة ليلة كامله ..

اليوم الثاني

اول شي نحضر ورق بارتشمنت نقصصه قطع مربعه

نطلع العجبنه من الثلاجة

ونقسمها لكور مقاس كل وحده مابين ( ٥٠ – ٦٠ جم)

راح تكون مابين ٨-١٠ كور ..

نشكلهم كور مرتبه متساوية ونضغط كل كورة بيدينا حتى نحاول نخليها مسطحة شوي ..

ونحط كل كورة على قطعة ورق بارتشمنت

الهدف من حركة الورق شيئين ..

حتى وقت مانشيل العجين بعد مايخمر نشيله بالورق ونحطه بالزيت

كذا نحافظ على الهوا داخل العجينة بدون مانحتاج نشيلها بيدينا ونحاول نحافظ على اننا مانطلع الهوا منها..

الشي الثاني مانضطر نحط طحين تحت العجين اللي ممكن يروح كله بالزيت وقت القلي ويخرب علينا الزيت ..

نغطيهم ونخليهم يخمرون مره ثانيه حتى يتضاعف حجمهم

راح تاخذ وقت مابين ٣-٤ ساعات ..

نحضر زيت للقلي ونسخنه لدرجة حرارة مابين ١٧٥-  ١٨٠ c

 نقلي كل ٢- ٣-٤ حبات مع بعض حسب حجم القدر وكمية الزيت

المهم مانزود الكمية حتى مايبرد الزيت ..

اذا جينا نقليهم ننزل الدونات بالزيت على سطحها

نقليهم مع كل جهة لمدة ٢ دقيقتين لثلاث دقايق

مجموع مدة القلي تقريباً ( ٥ دقايق)

نشيلهم من على الزيت ونحطهم على ورق تجفيف حتى نتخلص من الزيت الزايد

نقلب حبات الدونات بالسكر الناعم وهي ماتزال دافية ..

نخلي الدونات تبرد تماماً بعدين نحشيها بالبيستري كريم

او اي حشوة حسب الرغبة..

ملاحظات :

١/ في العجين اللي يحتاج وقت طويل لعجنه في العجانه

لازم نخلي العجانه ترتاح المهم ماتكون حارة وممكن تخرب معنا من مدة العجن الطويلة..

٢/ لازم التقيد بدرجة حرارة الزيت وانها تكون على نفس الدرجة اللي ذكرتها

طول مدة القلي وهي من اسرار نجاح الوصفة..

لو الزيت بارد بتتشرب الدونات بالزيت ..

ولو حار بتكون غامقه من برا ونيه من الداخل..

٣/ ورق البارتشمنت ضروري بالوصفة والأهم انه يكون بجودة عالية ومايلصق

فيه العجين لو لصق نكون كذا مااستفدنا شي وبالعكس بدال مانحاول نحافظ على الهوا ممكن يطلع معنا وقت مانحاول نفك العجين من الورق..

لو الورق اللي عندكم مايتفك منه العجين بسهولة ادهنوه بمسحة زيت..

٤/ من الممكن استخدام طحين بدال ورق البارتشمنت لكن قبل مانقليها نحاول نتخلص من الكمية الزايدة من الطحين قبل وضعها بالزيت

حتى مايمتلي الطحين بالزيت ويحترق ويطلع نكهة مو مستحبه بالدونات..

٥/ تبع للنقطه السابقه لازم نستخدم زيت جديد ونظيف لانه اي شي بالزيت ممكن توضح النكهة بالدونات..

٦/ ممكن استخدام السكر الباودر لتغطية الدونات بدال السكر الناعم..

…