تارت تغوبزين وفتروشكا

***

 

***

اليوم مدونتي كملت أربع سنوات من إفتتاحها ..

سعيده  بهالشي الحمدلله في هالأربع سنوات

قدرت أفيد وأساعد ناس كثير حتى لو بشي بسيط..

في فترات ولإنشغالي كنت أفكر ألغيها لكن العدد الكبير لزوار المدونة

واللي قاعد يزداد يوم عن يوم خلاني أشيل هالشي من بالي مره..

وبدال ماأفكر ألغيها صرت أفكر في تطويرها وفي إضافات جديدة..

إذا  ربي كتب راح أعلن عنها قريب..

…

بما إنه اليوم مميز للمدونة

الوصفة بتكون مميزة مررررره..

– تارت تغوبزين من فرنسا..

يسمى تارت لكن بالواقع هو بريوش مزين بالسكر اللؤلؤي

ومحشي بكريم موسلين ( بيستري كريم مع الزبدة او الكريم شانتيي)

ممكن ينضاف له الفواكة كإضافة لذيذة

لهالشي حبيت اضيف له التوت بما اني احب هالخليط اللذيذ بريوش+ كريم موسلين + توت..

يمكن وبدون مبالغة تكون هالوصفة من ألذ المخبوزات اللي ذقتها مؤخراً

لهالشي حبيت أشارككم بطريقتي فيها واللي عدلت عليها حتى تكون ألذ , أخف ، أسهل ..

…

قصة التارت بالمختصر..

في عام ١٩٤٥ (الكساندر ميكا) فتح بيكري في پروفنس/ فرنسا..

وكان يبيع انواع مختلفة من المخبوزات ومن ضمنها الكريم پاي

وهي وصفة من بلده الاصلي بولندا وكان قد تعلمها من جدته..

بعدها بعشر سنوات وفي عام ١٩٥٥ .. كان تصوير احد الأفلام

واللي تقوم ببطولته بريجيت باردو .. وكان الكساندر هو المسؤول عن تقديم الأكل لفريق العمل طول فترة التصوير..

ولقت الكريم پاي اللي يسويها اعجاب فريق العمل مره ..

لكن كان اسمها مو معروف يعني مالها أسم..

اقترحت بريجيت باردو اسم تارت تغوبزيان tarte tropezienne ..
ومن يومها تسمت بهالأسم..

ومازال محل الكساندر موجود في سان تروبيه la tarte tropézienne ..

***

 

***

المقادير:

للبريوش:

١٢٥ مل حليب كامل الدسم

٥٠ جم سكر

١ بيضة

١ ملعقة صغيرة ملح

١٢٥ جم زبدة غير مملحة

٣٠٠ جم طحين

١٠ جم خميرة

+ بيضة لدهن الوجة

سكر لؤلؤي

للبيستري كريم:

(هالكمية تعتبر اقل كمية بيستري كريم تقدرون تسوونها

اعتمدوا المقادير هذي للكميات القليلة  )

١٧٠ مل حليب

صفار بيضة

٢٥ جم سكر

١٣ جم نشأ

فانيلا

للموسلين..

البيستري كريم + ٥٠ جم زبدة

إضافة اختيارية : ٥٠ جم جبنة كريمية

ملاحظة : الأساس بالوصفة هو إضافة الزبدة فقط للبيستري كريم

وممكن إضافة الكريما المخفوقة لكن كإضافة لذيذة اضفت الجبنة الكريمية..

مكون إختياري :

توت

***

الطريقة:

للبريوش..

بالعجانة ..

نحط الحليب والبيض والخميرة والسكر ونخلط حتى يذوب السكر..

نخلط الطحين والملح ونضيفة تدريجياً لخليط البيض والحليب

نضيف مقدار ومانضيف زياده حتى ينخلط المقدار السابق

نخلط على سرعه منخفضة ..

وفي هذي المرحله الخبز بيكون قوامة مثل خليط الكيك الثقيل

لاتخافون عادي استمروا بالعجن كم دقيقة ..

بعدها ضيفوا الزبدة واعجنوا حتى العجينة تبدأ تترك وعاء الخلط..

راح تاخذ حوالي ٢٠ الى ٢٥ دقيقة عجن..

نحط العجينة بوعاء مدهون بالزيت ونغطية زين وندخلها الثلاجة لليوم الثاني..

في اليوم الثاني //

نقسم العجينة ل ثمان أو عشر قطع متساوية

انا قسمتها لثمان وزن كل قطعه بالضبط ٨٠ جم ..

لكن حسيت لو انها اصغر بتكون أحلا.. مثلاً لو قسمتها لعشر قطع..

ناخذ كل قطعه ونكورها ونحطها بصينية .. ونخلي مسافة بينهم..

ونخليها تخمر حتى يتضاعف حجمها ..

راح تاخذ حوالي الساعه والنصف إلى ساعتين..

بعدها ندهنها بالبيض ونوزع عليها السكر اللؤلؤي..

ندخلها بفرن مشغل من قبل على درجة ١٧٥ c

راح تاخذ حوالي ١٥ إلى ٢٠ دقيقة ..

ولأفضل طريقة اول ماتدخلونها رشوا جوانب الفرن بماء..

حتى تكونون بخار بالفرن..

…

للبيستري كريم ..

نسخن الحليب مع الفانيلا..

نخلط السكر وصفار البيض حتى يكون لونه أصفر فاتح..

نضيف النشاء لصفار البيض والسكر ونخلط حتى يمتزج زين..

اذا بدأ الحليب يغلي ناخذ منه مقدار صغير ونضيفة للبيض ..

ونحرك بسرعه .. نضيف باقي الحليب تدريجياً لخليط البيض ونحرك

نرجع الخليط على النار ونحرك بإستمرار حتى يثقل..

نحطه بصحن ونغطي وجة الكريم ببلاستيك تغليف ..

نسوي هالحركة حتى ماتتكون قشرة على وجة الكريم..

ننتظر الكريم يبرد وندخله الثلاجة ..

الخطوة الثانيه للكريم ..

إذا برد الكريم نكون مجهزين زبدة بدرجة حرارة الغرفه والجبنة الكريمية

نخلط الزبدة والجبنة زين ونضيفهم للبيستري كريم ..

نرجعهم الثلاجة كم ساعه حتى يبرد الخليط تماماً..

بعدها نحضر التارت ..

نقطعه بالنص .. نحشيه بالكريم والتوت ..

وطبعاً لو حبيتوا تقدمونه علطول ..

وإلا حطوه بالثلاجة وطلعوة قبل ماتاكلونه بعشر دقايق..

وبالعافية..

***********

فتروشكا..

***

***

أول مره ذقت الفتروشكا كان بمخبز كراوي بلندن ..

اعجبتني مره وتحمست أسويها بس ماجت فرصة..

لما سويت تارت تغوبزين بقى من العجينة..

ومن الكريم فقلت فرصة اني اسوي منها الفتروشكا..

وخصوصاً ان عجينة الفتروشكا الأصليه نفس البريوش..

يعني استخدموا للعجينة نفس عجينة التارت تغوبزين

والحشوة نفسها بس بدون الزبدة..

يعني ..

العجينة / بريوش ( عجينة التارت تغوبزين )

الحشوة / بيستري كريم + جبنة كريمية

الزينه / زينتها بالتوت والفستق وسكر البنفسج والليلك..

طريقة التشكيل /

ناخذ مقدار من العجينة نكورها ونفردها..

نجيب كاس مثلاً .. ونضغط بنص العجينة

ونحشيها بالنص بالكريم وندهن الأطراف ..

ندخلها الفرن على درجة ١٧٥c

حتى تنضج لمدة عشر إلى ١٥ دقيقة..

***

 

***

طيب ومثل ماعودتكم بكتب لكم نبذة عن الوصفة ..

الفتروشكا هي فطاير مشهورة بشرق أوروبا ..

تكون دائريه ومحشية من النص بجبن كوتج أو كواك مع الزبيب ..

واحيان يبدل الزبيب بالفواكة كأنواع التوت مثلاً..

طبعاً موب بس كذا الحشوة .. ممكن حتى تكون الحشوة مالحة..

طعمها قريب من فطائر الدانش..

***