برياني سندي

***

***

اهلين..

للبرياني أنواع .. هـنـا بويكبيديا موجود الأنواع لو حابين تعرفونها

هنا سويت برياني باكستاني..

اسمه سندي برياني .. وهو نسبة لمقاطعة السند بباكستان..

يتميز بإضافة البطاطس .. طريقتة سهله وطعمة لذيذ..

الكمية تكفي 7 اشخاص..

***

المقادير..

1 كيلو لحم غنم بدون عظم

3 حبات بصل متوسط الحجم مقطع شرايح

3 ملاعق كبيرة زنجبيل مبشور او معجون الزنجبيل

1 ملعقة كبيرة ثوم مهروس

100 جم زبادي

1 ملعقة كبيرة فلفل حار

2 ملعقة صغيرة كركم

2 ملعقة صغيرة بابريكا

1 ملعقة كبيرة كزبرة مطحونة

2 ملعقة صغيرة كمون مطحون

1 ملعقة صغيرة كمون حب

10 حبات قرنفل

3 اعواد قرفة

6 حبة هيل اخضر

3 حبات كمون بني

8 حبات فلفل أسود

3 حبات فلفل أخضر واحد عدل والباقي مقطع

3 حبات بطاطس متوسط

ملح

زيت

3 حبات طماطم مقطعه كبير

كمية من  الكزبرة الخضراء

وكمية من أوراق النعناع

* في الوصفة مكتوب حزمة نعناع وحزمة كزبرة لكن اشوفها كثيرة

الكمية حسب رغبتكم..

للرز..

500 جم رز مغسول و منقوع بماء من قبل

1 ملعقة كبيرة زعفران منقوع بشوي حليب

5 من اوراق الغار

1 عود قرفة

8 حبات هيل

5 حبات فلفل اسود عدل

3 حبات مسمار

ملح

1 ملعقة كبيرة ماء الكادي

للزينة ..

بصل مقلي

مكسرات

***

الطريقة..

في قدر نحط شوي زيت ونقلب البصل حتى يذبل ..

نضيف اللحم ونقلبة شوي .. بعدها الزنجبيل والثوم ..

نضيف الزبادي والبهارات ..

نضيف الفلفل الأخضر الكامل ..

و 250 مل ماء ونغطية ونخليه 45 دقيقة..

بنفس الوقت اللي يطبخ فيه اللحم ..

نسلق البطاطس حتى يصير لين.. وننشفه ونقطعه لأربع ونغلفة حتى يحتفظ بحرارتة

نسلق الرز مع البهارات ماعدا الزعفران..

أو نطبخة بطريقة الرز العادية لو حبيتوا..

وطريقة سلق الرز

اننا نضيفة لماء مغلي كثير نخلية على النار حتى ينضج وبعدها نصفيه من الماء

لما يخلص الرز نضيفلة ماء الكادي ونقسمة قسمين

ونضيف لجزء الزعفران المنقوع بحليب ونقلبه حتى يكتسب اللون والنكهه

نخلط الطماطم والفلفل الأخضر المقطع وأوراق النعناع والكزبرة

ولما يخلص اللحم وينضج..

ناخذ ثلث الخليط ونضيفه للحم ونخليه على النار من خمس لعشر دقايق

ونحتفظ بباقي خليط الطماطم للتزيين

للتقديم نحط  نص الرز الابيض بعده البطاطس وشوي من خليط الطماطم

بعدة باقي الرز الابيض بعده اللحم واخر شي  رز الزعفران

ونزين الرز بالمكسرات والبصل وممكن باقي سلطة الطماطم لوحابين..

وبالعافية..

***