مفروكة الفستق

مفروكة الفستق من الحلويات العربية السهله اللذيذة

لكن هذا بالأول والأخير يعتمد على نوع الفستق المستخدم

الفستق أنواع وفيه منه النوعية الزينة وفية أنواع طعمها أبداً مو حلو

لهالشي احرصوا على استخدام النوع الجيد

والا ماراح يطلع طعم المفروكة زي المطلوب..

المقادير..

3 1/2 كاس فستق مو مطحون

3/4 كاس كنافة مطحونة

1 كاس سكر بودر

2 ملعقة كبيرة زبدة لينة

4 ملاعق كبيرة ماء زهر

2 ملعقة كبيرة شيرة

للحشوة .. قشطة طازجة

للتزين .. قشطة ومكسرات أو زهر اليمون

الطريقة ..

في الفود بروسيسر نطحن الكنافة وناخذ منها مقدار 3/4 كاس

وفي مقلاية على نار هادية نحمصها حتى يصير لونها ذهبي

نخليها تبرد وبعدين نحطها بالفود بروسيسر مع الفستق والسكر وماء الزهر

نضيف الزبدة والشيرة.. ونخلط شوي..

نشكلها بقوالب صغيرة او نفردها في صينية نحشيها بالقشطة وبعدها طبقة ثانية فستق

ندخلها الثلاجة تبرد..

نزينها برشة فستق مطحون وقشطة وزهر الليمون او المكسرات المحمصة..

وبالعافية..

ملاحظة..

1- ممكن نستخدم الكنافة بدون تحميص..

2- أنا أستخدمت 4 ملاعق ماء زهر لأني ماأفضل ماء الورد

لكن لو حابين حطوا ملعقتين ماء زهر وملعقتين ماء ورد..

3- أستخدمت هنا قوالب صغيرة لكن تقدرون تحطونها في صينية

وتحطون فستق وبعدين قشطة وبعدين فستق .. دخلونها الثلاجة وتقطعونها بعد ماتبرد..

4- زينوها بزهر الليمون لو متوفر يطلع شكلها أحلا بكثير..

5- نتأكد من ان الفستق مافية ولاقشر ( اقصد القشر الخارجي)..

***