الكانلبلر ( كعكة القرفة السويدية) أو السينامون رولز

الكانلبلر ( كعكة القرفة السويدية) أو السينامون رولز

cinnamon bun02-1

***

بالبداية احب اصحح للي يسمونها سينابون أسمها سينامون بالميم مو الباء

السينابون هو اسم المحل بس السينامون Cinnamon معناتها القرفة

كثير منا يحب السينامون رولز.. وكثير محلات متخصصة فية

لكن اللي ألاحظة في الفترة الأخيرة مستوى المحلات اللي عندنا

اللي يقدمون السينامون رولز مرة رجع لورا

كثير أخذ منهم ماتكون فريش .. تصير بايته

وغالباً وأكثر شي تصير العجينة نفسها قاسية

طبعاً هذا الشي مايخلينا نهضم حقها مره لانه طعمها ونكهتها حلوة

لكن كل شي يكمل الثاني ولو كان شي ناقص خرب على الثاني

لهالشي جربت أسويها بالبيت وجربت  طرق كثيرة ..

لقيت أفضل الطرق السويدش بانز

وتسمى الكانلبلر Kanelbullar ومعناها بالعربي الكعك السويدي

يشابة كثير السينامون رولز .. الفرق بسيط

السويدش بانز يستخدم فيها الحليب والهيل وتكون بدون بيض في أغلبية الوصفات

وبعد تشكيلها تدهن بالبيض ويرش عليها السكر ..

طبعاً نقدر نستغني عن رش السكر عليها ونحط وايت صوص ومكسرات زي مانحب

بالنسبة للحشوة غيرت فيها سويتها من عندي

تقدرون تحطونها بس زبدة وسكر وسينامون

أو حطوا اللي تحبون ميزتها أنكم تقدرون تختارون الشي اللي تحبونه

خطوا الزبدة .. واختاروا باقي المكونات شوكولاتة أو فانيلا أو جوز هند

المجال مفتوح.. هنا أنا سويت نوعين بالقرفة والشوكولاته

أستخدمت السكر البني الغامق  Dark brown sugar

وهذي نبذة عنه للي مايعرفة..

هو دبس السكر وبطبيعته يكون رطب شوي

ويسمى ماسكوفادو Muscovado

ويعرف بعد بأسم Barbados sugar سكر بربادوس

 و  molasses sugar دبس السكر  و moist sugar السكر الرطب

لونة غامق و طعمة قوي غير السكر البني الفاتح

يدخل غالباً في صناعة الخبز..

هذا صورتة للي حاب يعرف شكلة كيف

 

الكمية .. (تجي 15 حبة تقريباً)

المقادير..

للعجين..

1 1/4 كاس حليب

1/2 كاس سكر

1 ملعقة صغيرة خميرة

1/2 ملعقة صغيرة ملح

1/3 كاس زبدة

3 1/4 كاس طحين

1 ملعقة صغيرة فانيلا

1 ملعقة صغيرة هيل (إختياري)

زيت للدهن

للحشوة..

حشوة القرفة..

1 1/2 ملعقة كبيرة زبدة

1 ملعقة كبيرة سكر بني

1 ملعقة كبيرة سكر بني غامق

3 ملاعق كبيرة سكر مع قرفة *

1 ملعقة كبيرة قرفة

1 ملعقة صغيرة كاكاو بودر

حشوة الشوكولاتة..

1 1/2 ملعقة كبيرة زبدة

2 ملعقة كبيرة كاكاو بودر

2 ملعقة كبيرة سكر بني

1 ملعقة كبيرة سكر بني غامق

للدهن..

1 بيضة مخفوقة مع 1/2 ملعقة صغيرة فانيلا

رشات سكر حبيبات *

للي يبي يحط صوص..

100 جم جبنة كريمية

100 جم سكر بودر

ربع كاس حليب

1 ملعقة صغيرة فانيلا

ولو نبيها ثقيلة نقلل الحليب ولو نبي خفيفة نزودة

على حسب اللي نحبة بس الأفضل يكون الصوص سايل وبنفس الوقت ثقيل

***

cinnamon bun03-1

الطريقة..

نسخن الزبدة ونحط عليها الحليب بعد ماتذوب

نخلية حتى يصير دافي بس مايوصل للغليان

ننتبة أنه يكون دافي بس مو حار لأننا راح نضيف علية الخميرة

ولو أضفناها وهو حار ماراح تتتخمر العجينة

( نغليه لدرجة 37)

بوعاء نحط الخميرة ونخلط معها الزبدة مع الحليب

بعدين نضيف الطحين والسكر والملح والهيل

نعجن بالعجانة لمدة 5 دقايق أو باليد لعشر دقايق

نخلي العجينة على شكل كورة وندهنها بالزيت

نغطيها بقماش مبلل ونخليها نص ساعة

نقسم العجين لقسمين ونفردها زين طبعاً نخليها رقيقة

لأننا راح نرجع نخليها تخمر وراح ترجع تنفش

نخلط مقادير الحشوة الأولى مع بعض.. الزبدة والسكر بأنواعة والقرفة والكاكاو

وندهن فيها العجين لكن نخلي الطرف اللي راح نسكر من عندة مقدار 1 سم بدون دهن

ونلف العجين نبدأ بلف الوسط بعدين الأطراف

والطرف الباقي ندهنه بالبيض ونسكر ه بالضغط علية

نقطعها بسكين كبيرة أو سكين الخبزعلى حسب الحجم اللي نبية

نحطها بصينية ونحط تحتها ورق زبدة ونخليها تخمر لمدة 40 دقيقة

بعدين ندهنها بالبيض مع الفانيلا.. ونرش عليها السكر

وطبعاً لو بنحط عليها صوص ومكسرات ماله داعي نرشها بالسكر

نكتفي بالبيض .. ندخلها بالفرن على درجة حرارة 180 / 350

لمدة مابين 8 إلى 15 دقيقة..

نطلعها ونخليها تبرد شوي وبعدين نضيفلها الصوص والمكسرات

لو كنا حاطينها بصوص..

وبالعافية.. 🙂

ملاحظات..

* السكر مع القرفة مره حلو للحلويات تلاقونة بالسوبرماركت

مافية ماركات كثيرة لقيتها.. غالباً الموجود فرشلي

لكن انا ازود علية في بعض الأحيان قرفة .. هذا الشي يرجع لكم

* بالنسبة للسكر اللي نرشة على السينامون نستغني عنه لة كنا بنحط وايت صوص..

***